दुपारची दुर्दैवी घटना; मुलीच्या लग्न मंडपातच वडिलांचा मृत्यू…

भंडारा :-मुलीचे लग्न समारंभ आटोपले आणि सनई चौघडा व ढोल ताशांचा गजर सुरू असतांनाच लग्न मंडपातच वडिलांना छातीत अचानक दुखू लागल्याने खाली कोसळले.त्यातच त्यांचा हृदयविकाराच्या तीव्र झटक्याने मृत्यू झाल्याची घटना भंडारा जिल्ह्याच्या तुमसर तालुक्यातील झारली गावात आज,मंगळवार २९ एप्रिलला दुपारी ३ वाजताच्या सुमारास घडली.ऐन मुलीच्या लग्न मंडपातच वडिलांचा मृत्यू झाल्याने संपूर्ण गावात शांतता पसरली.गणेश खरवडे वय ५४ वर्षे असे मृत मुलीच्या वडिलांचे नाव आहे.

गणेश खरवडे यांची मुलगी पल्लवी हीचा मोठ्या थाटामाटात आज मंगळवारी दुपारच्या सुमारास लग्न सोहळा पार पडला.सनई चौघडा व ढोल ताशांचा गजर सुरू होता.वऱ्हाडी पाहुणे मंडळींची जेवणासाठी अंगत-पंगत सुरू झाली.वडील लग्न मंडपात देखरेख करीत होते.अशातच त्यांच्या छातीत दुखू लागले व ते खाली कोसळले.खाली कोसळताच नातेवाईकांनी धाव घेतली. तोपर्यंत वडिलांची प्राणज्योत मावळली.घटनेने संपूर्ण पावणे मंडळी व गावकरी सुन्न झाले.