ट्रॅक्टरच्या समोरच मारली उडी अन् धावला मागे.. – चालकासह मजुराची उडाली भंबेरी..

चंद्रपूर :-शेतातील कापूस आणण्यासाठी ट्रॅक्टर घेऊन रस्त्याने जाणाऱ्या ट्रॅक्टरच्या समोरच चक्क वाघाने उडी मारून काही अंतरापर्यंत पाठलाग केल्याने ट्रॅक्टर चालकासह मजुराची भंबेरी उडून काहीकाळ बोबडी वळल्याची खळबळ जनक घटना काल,शनिवारी

चिमूर तालुक्याच्या नेरी-शिरपूर मार्गावरील शिरपूर टेकडी परिसरात घडली.सदरचा चित्तथरारक प्रसंग ट्रॅक्टर चालक मिथुन मेश्राम व मजूर बाळू वैरागडे यांच्या बाबतीत घडला.

अधिक माहिती अशी की,चंद्रपूर जिल्ह्याच्या काही  गावांमध्ये सध्याच्या घडीला कापूस वेचणी तथा कापूस काढणीचे काम सुरू आहे.अशातच चिमूर तालुक्याच्या शिरपूर येथील शेतकरी टिकाराम पिसे यांच्या शेतातून ३१ जानेवारीला कापूस काढणे सुरू होते.कापूस काढणीसाठी महिला शेतमजूर कामावर असतांना शेत शिवारातील भागात वाघाने डरकाळी फोडली.त्यामुळे महिला मजुरांची घाबरगुंडी उडाली.कापूस काढता-काढता महिला मजुरांनी शेतातून काढता पाय घेतला आणि घरी परतल्या.वाघाच्या डरकाळीमुळे शेतातील कापूस तसेच पडून राहिल्याने शेतकरी टिकाराम पिसे यांनी ट्रॅक्टर चालक मिथुन मेश्राम व मजूर बाळू वैरागडे यांना शेतातील कापूस आणण्यासाठी काल शनिवारी ट्रॅक्टर घेऊन जाण्यास सांगितले.त्यानुसार शेताकडे जात असतांना वाघाने शिरपूर टेकडी परिसरात ट्रॅक्टर समोरच अचानकपणे उडी मारली.वाघाने उडी मारतच चालकाने प्रसंगावधान साधून ट्रॅक्टर सुसाट वेगाने पळवला आणि आरडाओरड केली.तरीही वाघाने काही अंतरापर्यंत पाठलाग केला.चित्तथरारक घटनेने दोघांचीही काहीकाळ भंबेरी उडाली.त्यातच ओरड सुरू असतांना वाघाने जंगलाच्या दिशेने धूम ठोकल्याने दोघांनीही सुटकेचा निःश्वास सोडला.