वन्य प्राण्याची शिकार करणे पडले महागात.. – ११ जण ताब्यात; दोन दिवसांची वन कोठडी

गडचिरोली :-गडचिरोली जिल्हा जंगलव्याप्त जिल्हा असल्याने बऱ्याच तालुक्यातील जंगल परिसरात वन्यप्राणी आढळून येतात.कुठे वाघ,बिबट्या,हरीण, जंगली हत्ती,बारा शिंग्या,जंगली डुक्कर,निलगाय सह विविध प्राणी जंगलात वा रस्ता ओलांडताना दिसून येतात.अशातच जंगलव्याप्त परिसरात वास्तव्यास असणाऱ्या आदिवासी बांधव वा परिसरातील नागरिकांकडून शिकार करून मांस खाण्याचे प्रमाण निदर्शनास येऊ लागले आहे.असाच प्रकार गडचिरोली जिल्ह्याच्या चामोर्शी तालुक्यात उघडकीस आला आहे.सुरुवातीला जंगल परिसरात विद्युत प्रवाह सोडून नीलगायीची शिकार केली.शिकार होताच तिचे मांस वाटप केले.अशातच मांस शिजवीत असतांना वन विभागाने धाड टाकून १२ जणांवर गुन्हा दाखल करून ११ जण ताब्यात घेत न्यायालयात हजर केले असता न्यायालयाने त्यांना दोन दिवसांची वन कोठडी सुनावली आहे.

सविस्तर वृत्त असे की,चामोर्शी तालुक्याच्या कुनघाडा रै अंतर्गत येणाऱ्या गिलगाव जमी जंगल परिसरात विद्युत प्रवाह लावून नीलगायीची शिकार करण्यात आली असल्याची माहिती वनपरिक्षेत्र अधिकारी एम.ए.तावाडे, वनरक्षक आर.एस.बागडे यांना मिळाली.त्यानुसार गिलगाव जमी येथील अजय परशुराम मंटकवारच्या घरी छापा टाकला.अजय परशुराम मंटकवारच्या घरी छापा टाकताच सुरुवातीला त्याने उडवाउडवीची उत्तरे दिली.त्यामुळे घरातील झडती घेताच एका भांड्यात गीलगायीचे मांस शिजवलेले आढळले आणि भांडाफोड झाला.त्यानुसार इतरांच्या घरांची झडती घेताच तब्बल १२ जणांच्या घरी नीलगायीचे मांस शिजतांना आढळून आले.१२ पैकी ११ जणांना ताब्यात घेत वन्यप्राणी संरक्षक कायद्यानुसार गुन्हा दाखल करण्यात आला.११ आरोपींना न्यायालयात हजर केले असता न्यायालयाने त्यांना दोन दिवसांची वन कोठडी सुनावली आहे.