पतीच्या हत्ये प्रकरणी पत्नीस तीन दिवसांची पोलीस कोठडी.. -पतीच्या छाताडावर लाथ मारल्याचे प्रकरण..

नागपूर :-हॉटेलमध्ये वेटरचे काम करणाऱ्या पतीला दारूचे व्यसन जडले आणि दारू पिण्यासाठी तो पत्नीचे दागिने चोरून विकायला लागला.त्यामुळे चिडलेल्या पत्नीने रागाच्या भरात त्याच्या छाताडावर जोरात लाथ मारली.त्यातच त्याचा मृत्यू झाला. आरोपी पत्नीस अटक करून काल शनिवारी काटोल शहरातील न्यायालयात हजर केले असता न्यायालयाने तिला तीन दिवसांची पोलिस कोठडी सुनावली आहे.रोहित ऊर्फ माधव रामराव जाधव वय ३५ वर्षे, रा.हिंगोली असे मृताचे नाव आहे.तो दोन वर्षांपासून रिंगणाबोडी,ता.काटोल येथील हॉटेलमध्ये वेटरचे काम करायचा.

दारू पिण्यासाठी त्याने आधी पत्नीचे सोन्याचे मंगळसूत्र चोरून विकले होते.त्यातच त्याने गुरुवारी ३० जानेवारीला सोन्याची अंगठी घरून चोरून नेली व विकली.तो दारूच्या नशेत असतांना चिडलेल्या पत्नीने त्याच्या छाताडावर लाथ मारली आणि त्यातच त्याचा मृत्यू झाला होता.या प्रकरणात कोंढाळी पोलिसांनी शुक्रवारी त्याच्या पत्नीला ताब्यात घेत अटक केली.न्यायालयाने तिला तीन दिवसांची पोलिस कोठडी सुनावली आहे.कोंढाळी पोलिस ठाण्यात महिलांचे लॉकअप नसल्याने तिला काटोल ठाण्यातील लॉकअपमध्ये ठेवण्यात आले आहे.रोहितचा मृत्यू त्याच्या छातीच्या बरगड्या तुटल्याने झाल्याचे प्राथमिक पोस्टमार्टेम(पीएम) रिपोर्टमध्ये आढळून आले आहे. त्याला १० वर्षाचा साहिल व सात वर्षाचा श्री अशी दोन मुले आहेत.वडिलांची हत्या व आईला अटक केल्यानंतर पोलिसांनी या घटनेची माहिती रोहितच्या आई वडिलांना दिली होती. पोस्टमार्टमनंतर मृतदेह त्याची आई कोल्हाबाई रामराव जाधव हिच्या स्वाधीन करण्यात आला. पोलिसांनी साहिल व श्री या दोन्ही मुलांना त्यांच्या आजीच्या सुपूर्द केले.ती मृतदेह व दोन्ही नातवांना घेऊन हिंगोलीला निघून गेली. न्यायालयाकडून पोलीस कोठडी सुनावण्यात आल्याने भांडणाव्यतिरिक्त आणखी काही घडले होते काय? याचा उलगडा होणार आहे.