ट्रॅक्टरची डिव्हायडरला धडक; चार वर्षीय चिमुकल्याचा मृत्यू..

भंडारा :-जिल्ह्याच्या लाखांदूर शहरात भीषण अपघाताची घटना घडून चार वर्षीय चिमुकल्याचा दुर्दैवी मृत्यू झाल्याची घटना आज,शुक्रवार २६ डिसेंबर रोजी सकाळी साडे सात वाजेच्या सुमारास घडली.दक्ष अवसरे वय ४ वर्षे रा.लाखांदूर,जि.भंडारा असे अपघातात मृत पावलेल्या चिमुकल्याचे नाव आहे.तर निलेश अवसरे वय २७ वर्षे,रा.लाखांदूर असे जखमी ट्रॅक्टर चालकाचे नाव असून मृत दक्ष हा पुतण्या असल्याची माहिती आहे.

ट्रॅक्टर चालक निलेश अवसरे,चिमुकला दक्ष व काही सहकारी आज शुक्रवारी सकाळच्या सुमारास लाखांदूर शहरातून ट्रॅक्टरने जात होते.चालक निलेश हा मद्यधुंद अवस्थेत असल्याने आपली साईड सोडून विरुद्ध साईडने भरधाव वेगाने ट्रॅक्टर चालवीत असतांनाच त्याचे वाहनावरील नियंत्रण सुटले.यात ट्रॅक्टर रस्त्याच्या बाजूला असलेल्या डिव्हायडरला(दुभाजकाला)जाऊन धडकताच ट्रॉली पलटली.लागलीच शहरातील उपस्थित नागरिकांनी घटनास्थळी धाव घेत जखमींना तात्काळ लाखांदूर रुग्णालयात दाखल केले.मात्र,चिमुकल्याचा दुर्दैवी मृत्यू झाला.अपघात प्रकरणी चालक निलेश अवसरे याचेवर गुन्हा दाखल करण्याची प्रक्रिया सुरू होती.घटनेचा पुढील तपास लाखांदूर पोलीस प्रशासन करीत आहे. चिमुकल्याच्या मृत्यूने परिसरात हळहळ व्यक्त केली जात आहे.