घरी कुणीच नसल्याची संधी साधून चोरी करणाऱ्या चोरट्यास अटक.. – १ लाख २९ हजाराचा ऐवज हस्तगत..

चंद्रपूर :-जिल्ह्याच्या राजुरा शहरातील चोरट्याने घरी कुणीच नसल्याची संधी साधून १ लाख २९ हजाराचा ऐवज लंपास केला होता.त्यानुसार राजुरा पोलिसांनी तपासाची चक्रे गतीने फिरवीत अखेर चोरी करणाऱ्या चोरट्यास अटक केली आहे.शुभम दिलीप खोके वय २९ वर्षे रा.राजुरा असे चोरी करणाऱ्या आरोपीचे नाव आहे.माहितीनुसार,राजुरा शहराच्या पेठ वार्ड येथील रहिवासी असलेले प्रशांत कवडुजी बावणे हे घटनेच्या दिवशी आपल्या कुटुंबीयांसह शेतावर गेले होते.घरी कुणीही नसल्याने त्यांनी घराला कुलूप लावून दिवसभर शेतातील कामे करून सायंकाळच्या सुमारास घरी परतले.घरी परत येताच त्यांना घराचे दार उघडे दिसून आले.त्यातच आतमध्ये प्रवेश केला असता घरातील साहित्य तसेच आलमारीचे कपाट उघडे दिसून आले.त्यानुसार आलमारीची पाहणी केली असता सोन्याची अंगठी ६ नग २० ग्रॅम,चांदीची चाळ,नगदी रक्कम १० हजार,सोन्याची गोप १५ ग्रॅम, सोन्याची गोप ६ ग्रॅम,सोन्याची पोत १० ग्रॅम,कानातील सोन्याचे जोड ३ ग्रॅम असा एकूण १ लाख २९ हजाराचा ऐवज अज्ञात चोरट्याने लंपास केल्याचे बावणे यांना दिसून येताच धक्काच बसला.त्यामुळे त्यांनी अज्ञात चोरट्या विरुद्ध राजुरा पोलीस ठाण्यात तक्रार दाखल केली.घटनेचे गांभीर्य लक्षात घेता उपविभागीय पोलीस अधिकारी साखरे,प्रभारी पोलीस निरीक्षक निशिकांत रामटेके यांनी घटनास्थळ गाठून  गुन्हे शोध पथकास आरोपीचा शोध घेण्याबाबत निर्देशित केले.त्यानुसार राजुरा पोलिसांनी गुपित  माहितीच्या आधारे आरोपी शुभम खोके यास ताब्यात घेत चौकशी केली असता सुरुवातीला उडवा-उडविची उत्तरे दिली.मात्र,पोलिसी खाक्या दाखवताच शुभम याने गुन्ह्याची कबुली दिली.त्यानुसार पोलिसांनी चोरून नेलेला सर्व मुद्देमाल हस्तगत केला.घटनेचा पुढील तपास राजुरा पोलीस ठाण्याचे पोलिस उपनिरीक्षक भिष्मराज सोरते हे करीत आहेत.