उद्यापासून देसाईगंज तहसील कार्यालयासमोर बेमुदत ठिय्या आंदोलन.. – कोंढाळा-मेंढा वैनगंगा नदी घाटातून कोट्यवधी रुपयांचा अवैध वाळू उपसा प्रकरण…

देसाईगंज(गडचिरोली):-गडचिरोली जिल्ह्याच्या देसाईगंज तालुक्यातील कोंढाळा-मेंढा वैनगंगा नदी घाटातून कोट्यवधी रुपयांचा अवैध वाळू उपसा करण्यात आला असून कोंढाळा गावातील सुजाण नागरिक तसेच ग्रामपंचायत पदाधिकारी यांनी वेळोवेळी देसाईगंज महसूल विभागास अवैध वाळू उपसा प्रकरणी अवगत करून पत्रानिशी कळविले. मात्र,झोपेचे सोंग घेणारे प्रशासन ऐकण्याच्या मनःस्थितीत नसल्याने अखेर देसाईगंज महसूल प्रशासनासह जिल्हा प्रशासनास खळबळून जागे करण्याकरीता उद्या,सोमवार दिनांक-३० डिसेंबर पासून देसाईगंज तहसील कार्यालयासमोर कोट्यवधी रुपयांच्या अवैध वाळू उपसा प्रकरणी विविध मागण्या घेऊन नामदेव वसाके यांचेसह सत्यवान रामटेके बेमुदत ठिय्या आंदोलन करणार असल्याचे पत्रकाद्वारे कळविले आहे.

दिलेल्या पत्रकात म्हटले की,देसाईगंज तालुक्याच्या मौजा-कोंढाळा येथील मेंढा वैनगंगा नदी रेतीघाटाची कुठल्याही प्रकारची लिलाव प्रक्रिया न होता देसाईगंज महसूल विभागाचे मंडळ अधिकारी के.पी.ठाकरे आणि कोंढाळा साजाचे तलाठी अर्चना टीचकुले यांनी कुठल्याही प्रकारे अवैध वाळू उपसा प्रकरणी आळा घातला नसल्याने जवळपास २ किलोमिटर वर्तुळाकार अंतर जमिनीपासून ५ फुटाच्यावर हजारो ब्रास वाळूचे अवैधरित्या उत्खनन करण्यात आले व शासनाचा कोट्यवधी रुपयांचा महसूल बुडाला आहे.अवैध गौण खनिज उत्खनन व वाहतूक संबंधात दिनांक-२८ डिसेंबर २०२४ च्या रात्री ९.०७ वाजेच्या सुमारास वाळू भरलेला पकडलेला टीप्पर क्रमांक-एम एच ४० सीटी ९८९१(MH 40CT 9891) यावर सुरुवातीला पंचनामा करून जप्तीची कार्यवाही करण्यात आली; मात्र,सदर वाळू भरलेल्या टीप्परवर खरोखरच कारवाई करून अवैध गौण खनिज उत्खनन व वाहतूक संबंधात रकमेचा भरणा करण्यात आला काय? तसेच अवैध वाळू उपशावर तात्काळ आळा घालण्यात येणार काय?अश्या विविध मागण्या घेऊन उद्याला बेमुदत ठिय्या आंदोलन देसाईगंज तहसील कार्यालयासमोर करण्यात येणार असल्याने आता तरी प्रशासन खळबळून जागे होणार काय? याकडे सर्वांच्या नजरा भिडल्या आहेत.