आठ वर्षीय चिमुकलीवर अत्याचार करणाऱ्या नराधमास अटक..

नागपूर :-घराजवळ खेळत असलेल्या आठ वर्षीय दोन चिमुकल्या मुलींना खड्याचे घर दाखविण्याचे आमिष देत आरोपीने दोनपैकी एका मुलीवर अत्याचार केला असल्याची घटना काल,शनिवारी  २८ डिसेंबरच्या दुपारी १२ वाजताच्या सुमारास शहरात उजेडात आली.याप्रकरणी तक्रार प्राप्त होताच पोलिसांनी गुन्हा दाखल करीत आरोपीच्या मुसक्या आवळल्या.रवींद्र गणपत पसारे वय ३२ वर्षे,रा. भिवापूर असे आरोपीचे नाव आहे.

माहितीनुसार,आठ वर्षीय सोनू आणि मोनू (काल्पनिक नाव) या चुलत बहिणी काल शनिवारी  दुपारी घराशेजारी खेळत होत्या.तर आरोपी रवींद्र तेथे सायकल फिरवत होता.दरम्यान,आरोपी रवींद्रने सोनू आणि मोनूला ‘तुम्हाला खड्याचे घर दाखवतो’, असे सांगत त्यांना आपल्या घरी नेले.स्वयंपाकघरात चटई टाकत दोघींनाही त्यावर झोपायला सांगितले.या प्रकारामुळे घाबरलेली मोनू तेथून घराकडे पळत गेली तर सोनू तेथेच थांबून होती.आरोपीने चिमुकल्या सोनूशी लगट साधत तिच्याशी शारीरिक विकृत चाळे सुरू केले तर पळत गेलेल्या मोनूने थेट सोनूचे घर गाठत तिच्या आईला रवींद्रच्या कृत्याची माहिती दिली. त्यानंतर पाठोपाठ सोनूसुद्धा घाबरलेल्या अवस्थेत घरी पोहोचली व घडलेला प्रकार तिने आईला सांगितला. तक्रार प्राप्त होताच,पोलिसांनी आरोपीविरुद्ध गुन्हा नोंदवत आरोपीला अटक केली.

घटना पोलिसांपर्यंत पोहोचल्यानंतर विकृत मनोवृत्तीला कारवाईचा पोलिसी खाक्या दाखविण्यासाठी लागलीच पाऊल उचलले.पीडिता अतिशय लहान असल्यामुळे नाहक बदनामी होण्याच्या भीतीपोटी प्रारंभी कुटुंबीय धास्तावले होते. मात्र,ठाणेदार जयप्रकाश निर्मल यांनी पीडितेच्या कुटुंबियांना हिंमत देत विकृत मनोवृत्तीविरोधात पुढे येण्यास प्रेरित केले.पीडितेच्या आईकडून तक्रार दाखल होताच पोलिसांनी आरोपीच्या मुसक्या आवळल्या.घटने प्रकरणी पुढील तपास प्रभारी उपविभागीय पोलिस अधिकारी दीपक अग्रवाल करीत आहेत.