देसाईगंज येथे स्काऊट-गाईड विषयावरील मार्गदर्शन व उजळणी वर्ग उत्साहात संपन्न..

देसाईगंज(गडचिरोली):-भारत स्काऊट-गाईड्स जिल्हा कार्यालय गडचिरोली व जिल्हा परिषद शिक्षण विभाग (प्राथमिक/माध्यमिक)गडचिरोली यांच्या संयुक्त विद्यमाने नुकतेच राजर्षी शाहू महाराज नगर परिषद उच्च प्राथमिक शाळा,देसाईगंज येथे स्काऊट-गाईड विषयावरील उजळणी वर्ग,चर्चासत्र व नोंदणी मार्गदर्शन वर्ग उत्साहपूर्ण वातावरणात संपन्न झाला.

या प्रशिक्षणामध्ये देसाईगंज,आरमोरी,कुरखेडा व कोरची तालुक्यांतील शिक्षकांनी उत्स्फूर्त सहभाग नोंदविला. उपस्थित शिक्षकांना स्काऊट-गाईड चळवळीची उद्दिष्टे,अभ्यासक्रम,विविध उपक्रम,नोंदणी प्रक्रिया तसेच शाळास्तरावर राबविण्यात येणाऱ्या विविध कृतींबाबत सखोल आणि प्रात्यक्षिक मार्गदर्शन करण्यात आले.

कार्यक्रमाच्या अध्यक्षस्थानी देसाईगंजचे केंद्रप्रमुख  अंबाजी आमनार होते.तर प्रमुख अतिथी म्हणून मुख्याध्यापिका वंदना उसेंडी आणि मुख्याध्यापक  किशोर चव्हाण उपस्थित होते.

उजळणी वर्गामध्ये जिल्हा संघटक(स्काऊट)विवेक कहाळे,जिल्हा संघटक(गाईड)नीता आगलावे,कब मास्टर तथा मुख्याध्यापक खेमराज तिघरे,नितू मालाकार आणि साधना भुरसे यांनी विविध विषयांवर प्रभावी मार्गदर्शन केले.

या प्रसंगी कब मास्टर तथा मुख्याध्याप खेमराज तिघरे यांना मान्यवरांच्या हस्ते प्रतिष्ठेचे ए.एल.टी.प्रमाणपत्र व ‘Honourable Charge’ प्रदान करून गौरविण्यात आले.तसेच नितू मालाकार यांना ए.एल.टी.प्रशिक्षण यशस्वीरीत्या पूर्ण केल्याबद्दल प्रमाणपत्र प्रदान करण्यात आले.उपस्थित मान्यवरांनी दोन्ही प्रशिक्षणार्थींचे अभिनंदन करून त्यांच्या पुढील कार्यासाठी शुभेच्छा दिल्या.

कार्यक्रमाच्या यशस्वी आयोजनासाठी पियुष नंदनवार आणि श्रीकृष्ण ठाकरे यांनी विशेष परिश्रम घेतले. खेळीमेळीच्या वातावरणात अनुभवांची देवाणघेवाण, प्रात्यक्षिके आणि उपयुक्त चर्चांसह हा मार्गदर्शन व उजळणी वर्ग उत्साहात संपन्न झाला.