अपक्ष आमदार किशोर जोरगेवार आता तुतारी ऐवजी कमळ घेणार हाती; उद्याला पक्ष प्रवेश..

चंद्रपूर :-अपक्ष आमदार किशोर जोरगेवार आता तुतारी ऐवजी कमळ हाती घेणार आहेत.मागील निवडणुकीत चंद्रपूर विधानसभा मतदरसंघातून काँग्रेस आणि भाजपा उमेदवारांचा जोरगेवार यांनी दारूण पराभव केला होता.गेल्या काही दिवसांपासून जोरगेवार यांच्याबाबतीत अनेक नाट्यमय घडामोडी घडल्या. किशोर जोरगेवार शरद पवारांच्या उपस्थितीत राष्ट्रवादीत प्रवेश करणार होते; परंतु त्याला स्थानिक काँग्रेस खासदार प्रतिभा धानोरकर यांनी विरोध केला.त्यानंतर जोरगेवारांचा राष्ट्रवादीतील पक्षप्रवेश खोळंबला.आता ते भाजपात प्रवेश करणार आहेत.

किशोर जोरगेवारांचा राष्ट्रवादीतील प्रवेश खोळंबल्यानंतर ते भाजपात पक्षप्रवेश करतील अशी चर्चा सुरू होती.मात्र,त्याला भाजपा नेते सुधीर मुनगंटीवार यांनी विरोध केला.मुनगंटीवारांनी त्यांची नाराजी थेट दिल्लीत व्यक्त केली.त्यामुळे किशोर जोरगेवार हे पुन्हा अपक्ष निवडणुकीच्या रिंगणात उतरणार होते.परंतु भाजपाच्या वरिष्ठ नेतृत्वाने सुधीर मुनगंटीवारांची नाराजी दूर केली असून अपक्ष आमदार किशोर जोरगेवार यांच्या भाजपा पक्षप्रवेशाचा मार्ग मोकळा आहे.

उद्या सकाळी ११ वाजता अपक्ष आमदार किशोर जोरगेवार यांचा भाजपा पक्षप्रवेश चंद्रपूरात पार पडणार आहे.यावेळी सुधीर मुनगंटीवार उपस्थित असणार आहेत.भाजपा नेतृत्वाकडून किशोर जोरगेवारांच्या पक्षप्रवेशाला ग्रीन सिग्नल मिळाल्याने मुनगंटीवारांचा विरोध मावळल्याचे समोर आले आहे. किशोर जोरगेवार हे चंद्रपूरातून भाजपाचे उमेदवार असण्याची शक्यता आहे.किशोर जोरगेवार यांच्या पक्षप्रवेशामागे माजी खासदार हंसराज अहिर यांचे पाठबळ लाभल्याने जोरगेवारांचा भाजपा पक्षप्रवेश निश्चित झाला आहे.