अज्ञात वाहनाची दुचाकीला धडक; दोघांचा घटनास्थळीच मृत्यू..

चंद्रपूर :-एका अज्ञात वाहनाने दुचाकीला जोरदार धडक दिल्याने दोन तरुणांचा घटनास्थळीच मृत्यू झाल्याची घटना आज,सोमवार ११ मे रोजी सकाळच्या सुमारास चंद्रपूर जिल्ह्याच्या चिमूर तालुक्यातील शंकरपूर-भिसी राज्य महामार्गावरील आसोला बसस्थानक नजीक घडली.अमोल अरुण नन्नावरे वय ३० वर्षे,रा.शेगाव खुर्द,ता.भद्रावती व विकास दादाजी जांभुळे वय ३७ वर्षे,रा.टिटवी, ता.चिमूर असे अपघातात मृत पावलेल्या तरुणांची नावे आहेत.

अमोल व विकास हे दोघेही त्यांच्या एमएच ३४ बीए ८०९५ क्रमांकाच्या दुचाकीने टिटवीकडे जात असतांना आसोला बसस्थानकाजवळ मागेहून भरधाव वेगात येणाऱ्या एका अज्ञात वाहनाने त्यांच्या दुचाकीला जोरदार धडक दिली.अपघातात दोघांच्याही डोक्याला गंभीर मार लागल्याने दोघांचाही घटनास्थळीच मृत्यू झाला.अपघात घडताच अज्ञात वाहन चालक वाहनासह पसार झाला. घटनेची माहिती मिळताच पोलिसांनी घटनास्थळ गाठून पंचनामा केला व दोघांचेही मृतदेह शवविच्छेदनासाठी चिमूर ग्रामीण रुग्णालयात पाठविण्यात आले.पोलिसांनी अज्ञात वाहनचालकाविरुद्ध गुन्हा नोंदवून पुढील तपास सुरू केला आहे.