अखेर वैनगंगा नदीत बुडालेल्या दोन्ही तरुणांचे सापडले मृतदेह..

ब्रम्हपुरी(चंद्रपूर):-ब्रम्हपुरी तालुक्याच्या खरकाडा गावातील सात ते आठ तरुण काल रविवारी दुपारच्या सुमारास वैनगंगा नदीच्या तीरावर पार्टी करण्यासाठी गेले होते.त्यानंतर काही जणांनी आपण नदी पात्राच्या पलीकडे जाऊन पार्टी करू म्हणून सर्व तरुण नदीपात्र ओलांडून कोंढाळाच्या बाजूला आले.सर्वांचे जेवण आटोपल्यावर परत जात असतांनाच काहीजण पिंपळगाव-खरकाडा हद्दीतील नदीपात्रात आंघोळ करत होते.अश्यातच शुभम पुष्पराज बगमारे वय २४ वर्षे व शुभम विजय सहारे वय १९ वर्षे,रा.खरकाडा हे दोघेही नदीपात्रात आंघोळ करायला उतरले.पिंपळगाव-खरकाडा हद्दीतील नदीपात्रात डोह असल्याने पाण्याचा अंदाज न आल्याने शुभम बगमारे व शुभम सहारे दोघेही तरुण वाहुन गेले.सदर घटनेची माहिती मिळताच खरकडा-पिंपळगाव गावातील नागरिकांनी घटनास्थळाकडे धाव घेतली.सदर घटनेची माहिती पोलिसांना मिळताच त्यांनी घटनास्थळ गाठून तपासकार्य सुरू केले.मात्र,अंधार पडल्याने शोधकार्य थांबविण्यात आले.परत आज,सोमवार २ मार्चला देसाईगंज,ब्रम्हपुरी व आरमोरी पोलिसांकडून संयुक्तरित्या शोधकार्य सुरू करण्यात आले.दरम्यान, आज सकाळपासून नदीपात्रात बोटीद्वारे शोधकार्य सुरू होते.मात्र,शोधकार्यात तरुणांचा कुठेही थांगपत्ता लागत नसल्याने निलज येथील देवराम नामदेव मांढरे व प्रबिन बाबुराव मांढरे यांना पाचारण करून नदीपात्रात शोधमोहीम राबविण्यात आली असता दुपारी अडीच वाजेच्या सुमारास शुभम बगमारे व एका तासानंतर शुभम सहारे या दोन्ही तरुणांचे मृतदेह रवी गावाजवळील वैनगंगा नदीपात्रात आढळून आले.दोन्ही मृतदेह उत्तरीय तपासणीसाठी ब्रम्हपुरी ग्रामीण रुग्णालयात दाखल करण्यात आले असून पुढील तपास ब्रम्हपुरी पोलीस ठाण्याचे सहाय्यक पोलीस निरीक्षक बानबले यांच्या मार्गदर्शनाखाली पोलीस उपनिरीक्षक तीतीरमारे करीत आहेत.शोधकार्यात कोंढाळा बीटाचे सहाय्यक फौजदार करणशाह हुर्रा,प्रेमली जुमनाके यांचेसह कोंढाळा गावच्या पोलीस पाटील किरण कुंभलवार यांनी विशेष सहकार्य केले.