तब्बल बारा दिवसांपूर्वी आलेल्या धमकीच्या ‘ई-मेल’ ची धास्ती; उद्याला शाळांना सुट्टी..

नागपूर :-नागपूर शहरातील तब्बल डझनहून अधिक नामांकित शाळांसह १९ ठिकाणे बॉम्बने उडवून देण्याच्या धमकीचा ई-मेल मंगळवार १८ ऑगस्ट २०२६ रोजी सकाळच्या सुमारास शाळा तसेच इतर ठिकाणच्या अधिकृत ‘ई-मेल’ आयडीवर दिसून येताच शहरात एकच खळबळ उडाली होती.विशेष म्हणजे,शाळेच्या मुख्याध्यापकांनी ई-मेल पाहताच तातडीने याची माहिती पोलिसांना दिली.धमकीची माहिती मिळताच पोलिस यंत्रणा तात्काळ सतर्क झाली.नागपूरचे सहपोलिस आयुक्त नवीनचंद्र रेड्डी यांनी सर्व संबंधित अधिकाऱ्यांना अलर्ट जारी केला व तपास यंत्रणा कामाला लागली.ई-मेलमध्ये,शाळा विद्यार्थ्यांवर राष्ट्रीय स्वयंसेवक संघाचे विचार लादत आहेत आणि याच कारणामुळे संपूर्ण शाळा बॉम्बने उडवून देण्यात येतील.त्याचबरोबर,ई-मेलमध्ये खलिस्तान समर्थकांचा उल्लेख करीत ३१ ऑगस्टला स्फोट घडवून आणण्याची धमकी देण्यात आली होती.या पार्श्वभूमीवर खबरदारी आणि सुरक्षेच्या दृष्टीने शहरातील काही शाळांनी उद्या,सोमवार ३१ ऑगस्टला सुटी जाहीर केली आहे.बेसा-घोगली येथील माउंट लिट्रा झी स्कूलसह धमकीचे ई-मेल प्राप्त झालेल्या अन्य काही शाळांनीही सुटी जाहीर केली आहे. महत्वाचे म्हणजे,१८ ऑगस्ट रोजी hxggzf7@gmail.com या अज्ञात आयडीवरून धमकीचा ई मेल करण्यात आला होता, ज्यामुळे शहरभर सुरक्षेची भीती निर्माण झाली होती. त्यात डझनहून अधिक शाळा,उच्च न्यायालय,महापौरांचे कार्यालय आणि नागपूर महानगरपालिका यांना लक्ष्य करण्यात आले होते.ईमेलमध्ये दुपारी १.११ वाजता शाळांमध्ये,त्यानंतर दुपारी २.११ वाजता उच्च न्यायालयात आणि दुपारी ३.११ वाजता महानगरपालिकेत स्फोट घडवण्याची धमकी देण्यात आली होती.तसेच ३१ ऑगस्ट रोजी स्फोटाचा इशारा देण्यात आला होता.त्यानुसार,पोलिसांनी धमकी आलेल्या सर्व खासगी आणि सरकारी शाळांची कसून तपासणी केली होती.सुदैवाने तपासणीत कोठेही बॉम्ब किंवा कोणतीही संशयास्पद वस्तू आढळून आलेली नव्हती.त्यामुळे प्रशासनाने सुटकेचा निःश्वास टाकला. मात्र,अद्यापही धमकीच्या ‘ई-मेल’ ची धास्ती काहींच्या मनात घर करीत आहे.अश्यातच ई-मेलद्वारे शाळा उडवून देण्याच्या धमकीमुळे खबरदारीचा उपाय म्हणून प्रशासन सतर्क झाले आहे.ज्या ठिकाणी बॉम्बस्फोट घडवून आणण्याची धमकी देण्यात आली आहे; अश्या सर्व ठिकाणांवर बारकाईने नजर ठेवली जात आहे.