दुचाकीवरील चालकाचे नियंत्रण सुटून अपघात; होमगार्ड जवानाचा जागेवरच मृत्यू…

देसाईगंज(गडचिरोली):-देसाईगंज तालुक्याच्या किन्हाळा-मोहटोला वरून पूर्वेस शिरपूर मार्ग घनदाट जंगलाने व्यापलेला आहे.सदरचा मार्ग सायंकाळ झाली की,रहदारीसाठी पूर्णतः बंद स्वरूपात असतो.रात्रीच्या सुमारास एखादे वाहन पंक्चर वा अपघात झाल्यास कुठल्याही प्रकारचा त्या ठिकाणी ठावठिकाणा नसतो.असाच प्रकार काल,रविवारी उघडकीस आला आहे.काल,रविवारी सकाळी मोहटोला व विहीरगाव येथील युवक व्यायामाकरिता गेले असता,त्यांना रस्त्यावर अपघात झाल्याचे दिसून आले.जवळ जाऊन बघितले असता,पळसाच्या झाडाच्या फांद्या तुटून युवकावर पडल्या होत्या व दुचाकी वाहन बाजूला पडून होते.दुचाकीवरील चालकाचे नियंत्रण सुटून वाहन रस्त्यालगत पळसाच्या झाडावर आदळले असावे; असा अंदाज वर्तविण्यात आला.देवेंद्र श्यामराव देवरे वय ३५ वर्षे मु.वासी ता.कुरखेडा असे अपघातात ठार झालेल्या युवकाचे नाव आहे.तो कुरखेडा पोलिस ठाणे अंतर्गत गृहरक्षक(होमगार्ड) दलाचा जवान होता.सदरचा

अपघात शनिवार, १४ सप्टेंबरच्या रात्री देसाईगंज तालुक्यातील मोहटोला -किन्हाळा-शिरपूर मार्गावर महाजन डोंगरी परिसरात झाला.व्यायाम करण्याकरिता गेलेल्या युवकांनी सदर अपघाताची माहिती देसाईगंज पोलिस स्टेशनला दिली.एमएच ३३,एल-४००३ या क्रमांकाची दुचाकी घटनास्थळावरच पडून होती. देसाईगंज पोलिसांनी पंचनामा करून मर्ग दाखल केला आणि प्रेत उत्तरीय तपासणीसाठी ग्रामीण रुग्णालयात पाठविले.या घटनेचा अधिक तपास पोलिस निरीक्षक अजय जगताप यांच्या मार्गदर्शनात पोलिस हवालदार राजेंद्र मोहुर्ले करीत आहेत.