उद्याला देसाईगंज नगरीत आमदार मसराम यांच्या नेतृत्वात काँग्रेस कमिटीच्या वतीने भव्य रास्ता रोको आंदोलन..

देसाईगंज(गडचिरोली):-नीट परीक्षेच्या पेपर फुटी प्रकरणी न्यायाची मागणी करत दिल्लीत शांततेच्या मार्गाने आंदोलन करणाऱ्या विद्यार्थ्यांवर करण्यात आलेला अमानुष लाठीचार्ज हा लोकशाही मूल्यांवर झालेला गंभीर आघात असल्याचा निषेध व्यक्त करत

आमदार रामदास मसराम यांच्या नेतृत्वात काँग्रेस कमिटी आरमोरी विधानसभा क्षेत्राच्या वतीने उद्या,शुक्रवार २४ जुलै रोजी दुपारी २.३० वाजता कुरखेडा टी-पॉईंट,रेल्वे बोगद्याजवळ,देसाईगंज(वडसा)येथे भव्य रास्ता रोको आंदोलन आयोजित करण्यात येणार आहे.

काँग्रेस कमिटीने स्पष्ट केले की,पेपर फुटी,भ्रष्टाचार आणि विद्यार्थ्यांवरील अन्यायाविरोधात आवाज उठवणाऱ्या विद्यार्थ्यांवर लाठीमार करून त्यांचा आवाज दडपण्याचा प्रयत्न हा निषेधार्ह असून,अशा दडपशाहीचा काँग्रेस पक्ष तीव्र शब्दांत निषेध करत आहे.होऊ घातलेले आंदोलन हे कोणत्याही राजकीय हेतूने आयोजित करण्यात आलेले नसून न्यायासाठी लढणाऱ्या विद्यार्थ्यांच्या सन्मानासाठी आणि लोकशाही मूल्यांच्या रक्षणासाठी आहे. विद्यार्थ्यांवर झालेल्या अन्यायाविरुद्ध आवाज उठवणे ही समाजातील प्रत्येक जागरूक नागरिकाची जबाबदारी आहे.त्यामुळे या आंदोलनाकडे राजकीय दृष्टिकोनातून

न पाहता सामाजिक आणि लोकशाही हक्कांच्या लढ्याच्या दृष्टीने पाहण्याचे आवाहन करण्यात आले आहे.या आंदोलनात सर्व नागरिक,युवक,विद्यार्थी, सामाजिक संघटना तसेच सर्वपक्षीय लोकशाहीवादी नागरिकांनी कोणत्याही निमंत्रणाची वाट न पाहता मोठ्या संख्येने सहभागी होऊन न्यायाच्या लढ्याला आपला खंबीर पाठिंबा द्यावा,असे आवाहन आरमोरी विधानसभा क्षेत्राचे आमदार रामदास मसराम यांनी प्रसिध्दी पत्रकाद्वारे केले आहे.