९० किलो प्रतिबंधित तंबाखूसह ७ लाख १० हजार रुपये किंमतीचा मुद्देमाल जप्त..

नागपूर :-एका चारचाकी वाहनाने मध्य प्रदेशच्या पांढुर्णा येथून सावनेर मार्गे नागपूरच्या दिशेने प्रतिबंधित सुगंधित तंबाखूची वाहतूक करणाऱ्या दोघांच्या सावनेर तालुक्याच्या केळवद पोलिसांनी मुसक्या आवळल्या. सदरची कारवाई पांढुर्णा-सावनेर नागपूर राष्ट्रीय महामार्गावरील बिहाडा फाटा परिसरात केली.कारचालक सूरज मनोहर पाटील वय ३१ वर्षे,दाढेरा, ता.कळमेश्वर, जि.नागपूर व रोशन प्रदीप तलमले वय ३१ वर्षे, रा.रामनगर,वर्धा अशी अटक करण्यात आलेल्या दोघांची नावे असून या दोघांविरुद्ध गुन्हा दाखल करण्यात आला आहे.केळवद पोलिसांनी पांढुर्णा-सावनेर दरम्यानच्या बिहाडा फाटा परिसरात नाकेबंदी करून वाहनांची तपासणी केली असता एमएच ४० सीएक्स ७३८२ क्रमांकाच्या कारमध्ये मागच्या भागात ठेवलेल्या पोत्यात तंबाखूची पाकिटे व डबे आढळून आले.प्रकरणी पोलिसांनी ७ लाख रुपयांची कार आणि १८ हजार रुपये किंमतीचा तब्बल ९० किलो प्रतिबंधित सुगंधित तंबाखू असा एकूण ७ लाख १८ हजार रुपयांचा मुद्देमाल जप्त केला.याप्रकरणी केळवद पोलिसांनी भारतीय न्यायसंहिता(बीएनएस) कलम १२३,अन्न सुरक्षा आणि मानके अधिनियम कलम २७४,२७५,२२३ अन्वये गुन्हा नोंदवून तपास सुरू केला आहे.सदरची कारवाई केळवद पोलीस ठाण्याचे पोलिस निरीक्षक आशिषसिंग ठाकूर यांच्या नेतृत्वात पोलीस पथकाने केली.