शाखा अभियंत्याच्या निलंबनानंतर आता ग्रामसेवक निलंबित.. – गडचिरोली जिल्हा परिषदेच्या मुख्य कार्यकारी अधिकाऱ्यांचा कारवाईचा सपाटा..

गडचिरोली :-जिल्ह्यात मनमानीचा कारभार करू पाहणाऱ्या अधिकारी,कर्मचाऱ्यांवर गडचिरोली जिल्हा परिषदेचे मुख्य कार्यकारी अधिकारी सुहास गाडे यांनी कारवाईचा बडगा उगारण्यास सुरुवात केल्याने जिल्हा परिषद प्रशासनात एकच खळबळ उडाली आहे.नुकतेच जिल्ह्याच्या भामरागड तालुक्यातील ओरेवाडा ग्रामपंचायतीअंतर्गत आदिवासी विकास कार्यक्रमाच्या ५३ विकासकामांच्या ई-निविदा प्रक्रियेत गंभीर अनियमितता केल्याचा ठपका ठेवत भामरागड पंचायत समितीचे शाखा अभियंता गोविंद शिरपूरकर यांना निलंबित करण्यात आलेले असतांनाच आता एटापल्ली तालुक्यातील सेवारी ग्रामपंचायतीचे ग्रामसेवक (ग्रामपंचायत अधिकारी)मनोज गेडाम यांना जिल्हा परिषदेचे मुख्य कार्यकारी अधिकारी यांनी निलंबित केले आहे.ग्रामपंचायतीच्या प्रशासकीय कारभार,आर्थिक व्यवहार आणि ग्रामस्थांच्या तक्रारींच्या चौकशीनंतर सदरची कारवाई करण्यात आली.मनोज गेडाम यांच्या बाबतीत ग्रामसभा व मासिक सभा नियमित न घेणे, सभांचे कार्यवृत्त न लिहिणे,१५ व्या वित्त आयोगाच्या निधीतून करण्यात आलेल्या खरेदी प्रक्रियेत ई-निविदा, पाच टक्के अबंध निधीचा नियमबाह्य वापर करणे तसेच मुख्यालयात अनुपस्थित राहणे,अशा बाबी चौकशीत निदर्शनास आल्या.त्यानुसार सखोल चौकशी अंती मनोज गेडाम यांना निलंबित करण्यात आले व निलंबन काळात

त्यांना भामरागड पंचायत समिती मुख्यालय निश्चित करण्यात आले आहे.