देसाईगंजच्या जुनी वडसा येथील सिटी सर्व्हे प्रक्रिया अंतिम टप्प्यात; हरकतींसाठी पंधरा दिवसांची मुदत..

गडचिरोली :-भूमी अभिलेख विभागामार्फत देसाईगंज शहराच्या मौजा-जुनी वडसा येथील नगर भूमापन(सिटी सर्व्हे)प्रक्रिया अंतिम टप्प्यात आली असून, जमीनधारकांचे हक्क व सीमा दर्शविणारा प्रारूप नगर भूमापन अभिलेख(मिळकत पत्रिका/नकाशा)तयार करण्यात आला आहे.संबंधित जमीनमालक व नागरिकांच्या पाहणीसाठी हा अभिलेख उप अधीक्षक भूमी अभिलेख,देसाईगंज यांच्या तहसील कार्यालयाच्या प्रशासकीय इमारतीतील कार्यालयात उपलब्ध करून देण्यात आला आहे.

प्रारूप नगर भूमापन अभिलेखातील मिळकत पत्रिकेवर नोंदविण्यात आलेले नाव,क्षेत्रफळ,चतुःसीमा अथवा अन्य कोणत्याही नोंदीबाबत संबंधितांना हरकत,आक्षेप किंवा तक्रार असल्यास ती आवश्यक पुराव्यांसह लेखी स्वरूपात भूमी अभिलेख,देसाईगंज कार्यालयात सादर करता येणार आहे.त्यासाठी २३ सप्टेंबर २०२६ रोजी सायंकाळी ५ वाजेपर्यंत मुदत देण्यात आली आहे. संबंधित जमीनधारक व नागरिकांनी अभिलेखाची पाहणी करून आवश्यक असल्यास विहित मुदतीत हरकती नोंदवाव्यात,असे आवाहन देसाईगंज भूमी अभिलेख विभागाचे उप अधीक्षक मुकेश डी.सेलोकर यांनी केले आहे.