तलवारीने केक कापणार तितक्यातच पोलिसांची एंट्री; बर्थडे बॉयसह चौघांविरुद्ध गुन्हा दाखल..

चंद्रपूर :-काहीजणांचा वाढदिवस म्हटला की,मौज-मजा, पार्टी आणि नुसता जल्लोष.हे सर्व ठीक आहे; पण, जल्लोषाच्या भरात काही नियमांचे पालनही करणे तितकेच महत्वाचे आहे.मात्र,जोशा-जोशात अनेक तरुण मंडळी होश खोऊन बसतात.अश्याच प्रकारे काही अल्पवयीन व तरुण मुलांनी हातात तलवार घेत केक कापणार तोच पोलिसांची एंट्री झाली आणि बर्थडे बॉयसह चौघांविरुद्ध थेट गुन्हाच दाखल झाला.यात १८ वर्षीय बर्थडे बॉय सक्षम रवि मंत्रीवार, तिरुपती अशोक कटकमवार व २ विधिसंघर्ष बालक यांच्याविरुद्ध बल्लारपूर पोलीस ठाण्यात शस्त्र अधिनियम कलम २५ व ४ अन्वये गुन्हा दाखल करण्यात आला.

चंद्रपूर जिल्ह्याच्या बल्लारपूर पोलिस ठाण्याच्या हद्दीतील जुनोना येथे काही अल्पवयीन मुले हातात तलवार घेत दहशत निर्माण करण्याचा प्रयत्न करीत असल्याची माहिती गावातील सरपंच यांनी पोलिसांना दिली होती. माहिती मिळताच बल्लारपूर पोलिस जुनोनामधील कोपुलवार रिसॉर्टमध्ये गेले असता त्याठिकाणी चार मुले आढळून आली.पोलिसांनी त्यांना इथे कशाला आलात, याबाबत विचारणा केली असता मित्राचा वाढदिवस साजरा करण्यासाठी आम्ही पार्टी करण्यासाठी आलो आहे.पोलिसांनी मुलांना विश्वासात घेत तलवारीबाबत विचारणा केली असता ती तलवार केक कापण्यासाठी आणली असल्याचे सांगितले.पोलिस येत असल्याची माहिती मिळाल्याने ती तलवार रिसॉर्टच्या वॉलकम्पाऊंडच्या बाजूला कचऱ्यामध्ये लपवून ठेवली होती.प्रकरणी पोलिसांनी तलवार जप्त करून चौघांवर गुन्हा दाखल केला आहे.