एका अज्ञात तरुणाचा शेत शिवारात आढळला मृतदेह..

चंद्रपूर :-जिल्ह्याच्या सिंदेवाही तालुक्यातील  लाडबोरी गाव नजीकच्या शेत शिवारात आज,बुधवार १८ मार्च रोजी दुपारच्या सुमारास एका अज्ञात तरुणाचा चक्क मृतदेह आढळून आल्याने परिसरात एकच खळबळ माजली आहे.घटनेची माहिती होताच ग्रामस्थांनी मोठी गर्दी करीत सिंदेवाही पोलिसांना पाचारण केले.लागलीच सिंदेवाही पोलीस ठाण्याचे ठाणेदार कांचन पांडे पोलीस पथकासह घटनास्थळी दाखल होत मृतदेहाची पाहणी करून परिसरातील कुण्या तरुणाचा मृतदेह असल्यास कळविण्याचे आवाहन केले.प्रसंगी उपस्थित नागरिकांनी सदर तरुण परिसरातील नसल्याचे स्पष्ट करताच पोलिसांनी पंचनामा करून पुढील तपास सुरू केला आहे.मृत व्यक्तीचे अंदाजे वय ३० ते ३५ वर्षे असून अंगात लाल रंगाची शर्ट व निळसर रंगाचा पँट घातलेला आहे.सदर तरुण शेत शिवारात कशासाठी गेला होता, त्याला कुणी मारून फेकले की काय? असे अनेक प्रश्न उपस्थित होत असल्याने पोलिसांपुढे मोठे आव्हान उभे असून मृताची ओळख पटविण्याचे काम सिंदेवाही पोलिसांकडून सुरू आहे.त्यातच,शवविच्छेदन अहवालातून तरुणाच्या मृत्यूचे नेमके कारण स्पष्ट होणार आहे.