शिवराजपूर येथे ‘ज्ञानज्योती’ वाचनालयाचे उद्घाटन..

देसाईगंज(गडचिरोली):-देसाईगंज तालुक्याच्या  शिवराजपूर येथे ज्ञानज्योती युवा मंडळाच्या पुढाकाराने तथा ग्रामपंचायतीच्या सहकार्याने गावातील विद्यार्थ्यांच्या शैक्षणिक तथा बौद्धिक क्षमतेत भर पडावा तसेच अनेकांना वाचनाची सवय जडावी,यासाठी महत्त्वपूर्ण उपक्रम राबवून ‘ज्ञानज्योती’ वाचनालयाचे उद्घाटन करण्यात आले.

वाचनालयाच्या उभारणीसाठी ग्रामपंचायतीच्या वतीने इमारत उपलब्ध करून देण्यात आली,तर ग्रामस्थांनी इतर साहित्य पुरवठ्यासाठी आर्थिक योगदान दिले. त्यातून फर्निचर,लाईन फिटिंग व इतर आवश्यक सुविधा पुरविण्यात आल्या.ग्रामस्थांच्या एकजुटीमुळेच ज्ञानज्योती वाचनालय सर्व सोयी-सुविधांनी सज्ज झाले आहे.सदरचे वाचनालय हे स्पर्धा परीक्षा,शालेय तसेच महाविद्यालयीन शिक्षणासाठी उपयुक्त ठरणार आहे. याशिवाय,सर्वसामान्य वाचकांसाठीही एक महत्त्वाचे व्यासपीठ ठरणार आहे.या उपक्रमात योगदान देणाऱ्या सर्व वर्गणीधारक ग्रामस्थांचे आभार ग्रामपंचायत तथा ज्ञानज्योती युवा मंडळाच्या वतीने करण्यात आले असून गावात शैक्षणिक वातावरण वृद्धिंगत करण्यासाठी ज्ञानज्योती वाचनालय हे एक महत्त्वपूर्ण पाऊल ठरले आहे.सदर वाचनालयाचे उद्घाटन शिवराजपूर गट ग्रामपंचायतीच्या सरपंचा सयाम यांनी केले.तर कार्यक्रमाचे संचालन प्रा.योगेश तुपट,प्रास्ताविक दिनेश बेदरे व उपस्थितांचे आभार लोकमान्य बरडे यांनी मानले. प्रसंगी अध्यक्ष वासुदेव झीलपे,ग्रामपंचायत पदाधिकारी, विद्यार्थी व ग्रामस्थ उपस्थित होते.