मुला-मुलींसाठी शासकीय वसतिगृह प्रवेश प्रक्रियेची ऑनलाइन नोंदणी सुरू..

गडचिरोली :-शैक्षणिक सत्र २०२५-२६ करिता इतर मागासवर्ग,विमुक्त जाती,भटक्या जमाती व विशेष मागास प्रवर्गातील मुला-मुलींसाठी शासकीय वसतिगृह प्रवेश प्रक्रियेची ऑनलाइन नोंदणी सुरू झाली आहे.या प्रक्रियेत शासकीय वसतिगृहांबरोबरच ज्ञानज्योती सावित्रीबाई फुले आधार योजना व पंडित दिनदयाल उपाध्याय स्वयंम योजना अंतर्गत उच्च शिक्षण घेणाऱ्या विद्यार्थ्यांनाही प्रवेश दिला जाणार आहे.

शासनाच्या http://hmas.mahait.org या ऑनलाइन पोर्टलवरून अर्ज करता येणार असून अर्ज दाखल करण्याची मुदत १९ ते २९ सप्टेंबर २०२५ अशी निश्चित करण्यात आली आहे.ऑनलाइन अर्ज भरल्यानंतर त्याची प्रिंट व आवश्यक कागदपत्रे संबंधित वसतिगृह प्रमुखांकडे सादर करणे बंधनकारक आहे.

शासकीय वसतिगृहांमध्ये प्रवेश गुणवत्तेनुसार व वसतिगृह क्षमतेनुसार दिला जाणार आहे.पात्रता असूनही वसतिगृहात जागा न मिळालेल्या विद्यार्थ्यांना स्वयंम व आधार या योजनांमधून प्रवेशासाठी विचारात घेतले जाईल.त्यामुळे अधिकाधिक विद्यार्थ्यांना उच्च शिक्षणाची संधी उपलब्ध होणार आहे.

अधिक माहितीसाठी इतर मागास वर्ग,विशेष मागास प्रवर्ग व विशेष जाती भटक्या जमाती मुला-मुलींचे शासकीय वसतिगृह गडचिरोली येथील गृहपाल किंवा सहाय्यक संचालक,इतर मागास बहुजन कल्याण कार्यालय,गडचिरोली यांच्याशी संपर्क साधावा, असे आवाहन डॉ.सचिन मडावी,सहाय्यक संचालक,इतर मागास बहुजन कल्याण विभाग,गडचिरोली यांनी केले आहे.