कुरूड-कोंढाळा बिटातील पोलीस उपनिरीक्षकाचा अपघात.. -नागपूरच्या खासगी रुग्णालयात हलवले; मृत्यूशी झुंज सुरू..

देसाईगंज(गडचिरोली):-देसाईगंज तालुक्याच्या 

कुरूड-कोंढाळा बिटातील ५६ वर्षीय पोलीस उपनिरीक्षक संतोष रमेश मरसकोल्हे यांच्या दुचाकीचा अपघात होऊन झालेल्या अपघातात गंभीर जखमी झाले.त्यांच्या डोक्याला जबर मार लागल्याने त्यांना प्रथम ब्रम्हपुरी व त्यानंतर पुढील उपचारार्थ नागपूरच्या खासगी रुग्णालयात हलविण्यात आले असून,त्यांची मृत्यूशी झुंज सुरू आहे.सदरचा अपघात हा त्यांच्या दुचाकीला रानडुकराने दिलेल्या धडकेने घडल्याची माहिती आहे.

संतोष मरसकोल्हे हे देसाईगंज पोलीस ठाण्यात पोलीस उपनिरीक्षक(पीएसआय)पदावर कार्यरत असून त्यांच्याकडे कुरूड,कोंढाळा,शिवराजपुर, उसेगाव,तुळशी व कोकडी इत्यादी गावांचा कारभार सोपविण्यात आला आहे.अपघात घडण्यापूर्वी ते आरमोरीत राहत असल्याने देसाईगंज पोलीस ठाण्यातील शुक्रवारची रात्रपाळी संपवून काल शनिवारच्या पहाटे देसाईगंजवरून दुचाकीने आरमोरीकडे परत जात होते.दरम्यान,आरमोरी मार्गावर अचानकपणे समोर आलेल्या रानडुकराने त्यांच्या दुचाकीला जोरदार धडक दिली.धडक बसताच मरसकोल्हे हे डोक्याच्या भारावर खाली कोसळले. यात डोक्याला गंभीर मार लागल्याने त्यांना तात्काळ ब्रम्हपुरीच्या आस्था रुग्णालयात दाखल करण्यात आले. मात्र,प्रकृती चिंताजनक असल्याने त्यांना नागपूरला हलविण्यात आले.विशेष म्हणजे,कोंढाळा ते आरमोरी मार्ग जंगल परिसराने वेढलेला असल्याने या मार्गावरून नेहमीच जंगली प्राण्यांची भ्रमंती सुरू असते.त्यामुळे वाहने चालवतांना काळजीपूर्वक आणि हळू चालवणे गरजेचे आहे.