देसाईगंज तालुका दुष्काळग्रस्त घोषित करण्याची मागणी; उबाठा शिवसेनेचे निवेदन..

देसाईगंज(गडचिरोली):-गडचिरोली जिल्ह्याच्या

देसाईगंज तालुक्यात यावर्षी पावसाने ओढ दिल्याने तसेच वातावरणातील बदलामुळे धान पिकांवर मोठ्या प्रमाणात कीड व रोगांचा प्रादुर्भाव झाला आहे. शेतकऱ्यांनी औषधांची फवारणी करूनही परिस्थितीत अपेक्षित सुधारणा झालेली नाही.त्यातच,अलीकडे झालेल्या वादळी पावसामुळे शेतकऱ्यांचे मोठे नुकसान झाले आहे.या पार्श्वभूमीवर देसाईगंज तालुका दुष्काळग्रस्त घोषित करून शेतकऱ्यांना तातडीने मदत द्यावी,या प्रमुख मागणीसह आज,बुधवार ३० सप्टेंबर रोजी शिवसेना(उद्धव बाळासाहेब ठाकरे)पक्षाच्या वतीने देसाईगंज उपविभागीय अधिकारी कार्यालयाचे नायब तहसिलदार विलास तुपट यांच्या मार्फतिने प्रशासनास निवेदन सादर करण्यात आले.

निसर्गाच्या लहरीपणामुळे शेतकरी बांधव मेटाकुटीला आला आहे.नैसर्गिक आपत्तीचा सर्वात जास्त फटका हा शेतकरी बांधवांनाच बसतांना दिसून येतो आहे.दरवर्षी कोणती ना कोणती नैसर्गिक आपत्ती ओढवून उत्पादनात घट होऊन आर्थिक संकटांचा सामना शेतकरी बांधवांना करावा लागतो आहे.अश्यातच सरकार शेतकऱ्यांप्रति संवेदनशील नसल्याची भावना शिवसेनेच्या नेत्यांनी व्यक्त केली.विशेषतः मागील वर्षी जाहीर झालेला धानाचा बोनस अद्यापही शेतकरी बांधवांना देण्यात आलेला नसल्याने शासनाने तातडीने शेतकऱ्यांच्या बँक खात्यात जमा करावा.संजय गांधी निराधार योजनेचे थकीत मानधन लाभार्थ्यांच्या खात्यात लवकर जमा करावे. शेतकऱ्यांची आर्थिक परिस्थिती लक्षात घेऊन दहावी व बारावीच्या विद्यार्थ्यांची परीक्षा फी माफ करावी.

शेतीपूरक कर्जाची सक्तीची वसुली करू नये.शेतकऱ्यांना आर्थिक आधार मिळण्यासाठी शेतीपूरक व्यवसायांना जास्तीत जास्त प्राधान्य द्यावे.शेतकरी व शेतमजुरांच्या अडचणींचा सर्वंकष विचार करून शासनाने या मागण्या तातडीने मान्य कराव्यात,अशी मागणी शिवसेनेच्या नेत्यांनी केली आहे.मागण्या मान्य न झाल्यास शिवसेना (उद्धव बाळासाहेब ठाकरे)पक्षाच्या वतीने तीव्र आंदोलन करण्यात येईल,असा इशारा निवेदनातून देण्यात आला आहे.

निवेदन सादर करतेवेळी जिल्हा सह संपर्क प्रमुख डॉ.श्रीकांत बनसोड,देसाईगंज तालुकाप्रमुख विलास ठाकरे, दिगांबर मेश्राम माजी जिल्हा परिषद सदस्य, गणेश ढवळे माजी सभापती,प्रल्हाद राऊत माजी पंचायत समिती सदस्य,संपत कावळे,विजय दडमल सरपंच पोटगाव,प्रशांत मैंद,शामराव गुरुणुले,जयराम झुरे,भास्कर ठाकरे,संजय हजारे,देवकुमार मानकर, माणिक धनबाते,अनिल नवघडे,यादव पारधी,राहुल घोडेस्वार,अमरदास पिलारे,धनंजय लांजेवार,अजय मोहूर्ले यांचेसह तालुक्यातील शिवसेनेचे कार्यकर्ते उपस्थित होते.