खोटी जाहिरात देऊन नोकरीचे आमिष; दोघांविरोधात गुन्हे दाखल..

चंद्रपूर :-हल्ली सगळीकडेच बेरोजगारांची फौज तयार झाली आहे.नोकरीसाठी धडपडणारे अनेक तरुण वय ओलांडून हताश होऊ लागलेत.काही तरुण नोकरीसाठी निघणाऱ्या जाहिरातीकडे टक लावून पाहत असतात,हे अनेकांना माहीत आहे.त्यामुळेच फसवणुकीचे प्रकार दिवसेंदिवस वाढलेले दिसून येतात.असाच प्रकार चंद्रपूर जिल्ह्याच्या मूल शहरात उघडकीस आला आहे.नोकरीचे आमिष दाखवून पहिल्यांदा खोटी जाहिरात तयार केली व नंतर पैसे रेटून तिर्री दाखविण्यात आले.सदर प्रकार उघडकीस येताच दोघांविरोधात गुन्हे दाखल करण्यात आले आहे.राजू पुद्धटवार रा.गुजरी चौक,मूल व प्रशांत ऊर्फ नाना आकेवार रा.पंचशील वॉर्ड,मूल अशी आरोपींची नावे असून राहुल महाजनवार यांच्या तक्रारीवरून मूल पोलिसांनी दोघांविरुद्ध गुन्हा दाखल केला आहे.

आरोपी राजू पुद्धटवार व प्रशांत आकेवार या दोघांनी मूल नगर परिषदेमध्ये नोकर भरतीची बनावट जाहिरात तयार करून सोशल मीडियावर व्हायरल केली होती.या प्रकारातून सुशिक्षित बेरोजगारांना लाखोंना गंडवल्याची चर्चा शहरात सुरू होती. दरम्यान,१२ जून २०२५ रोजी परसोडा येथील साईश्वर पुलगमवार यांनी नगर परिषदेत लिपिकाची नोकरी लावून देण्याच्या नावाखाली १० लाख ५० हजार रुपयांनी फसवणूक झाल्याची तक्रार मूल पोलिस ठाण्यात दाखल केली.या तक्रारीवरून पोलिसांनी चौकशी सुरू केली.राहुल महाजनवार यांनीही नोकरीच्या नावाखाली ६ लाख ५० हजारांनी फसवणूक झाल्याची तक्रार केली.साईश्वर भालचंद्र पुलगमवार यांनीही तक्रार दाखल केली.नगर परिषदेची बनावट जाहिरात तयार करून समाज माध्यमात व्हायरल करणे,नोकरीचे आमिष दाखवून बेरोजगारांना फसवणे व इतर गंभीर गुन्हे आरोपींविरुद्ध दाखल करण्यात आले.