चक्क टोल कर्मचाऱ्याच्या अंगावरच चालकाने घातली गाडी..

चंद्रपूर :-टोल कर्मचाऱ्याने कार चालकाकडून टोल मागितला असता,चक्क चालकाने कर्मचाऱ्याच्या अंगावरच गाडी घातल्याचा धक्कादायक प्रकार चंद्रपूर जिल्ह्याच्या बल्लारशाह येथील विसापूर टोल नाक्यावर रात्री एक वाजेच्या सुमारास उघडकीस आला.कारचालक इथेच थांबला नाही तर,त्याने टोल कर्मचाऱ्याला काही मीटर अंतरावर फरफटत देखील नेले.यात २७ वर्षीय संजय अरुण वांढरे गंभीर जखमी झाला आहे.संजय वांढरे हा विसापूर टोल नाक्यावर संगणक ऑपरेटर म्हणून काम करत होता.घटनेनंतर बल्लारपूर पोलिसांकडे तक्रार दाखल करण्यात आली आहे.वाहन चालक बेपत्ता असला तरीही सदरची घटना सीसीटीव्हीमध्ये कैद झाली आहे.शनिवारच्या रात्री १ वाजताच्या सुमारास बल्लारशाहहून चंद्रपूरकडे जाणाऱ्या एका टाटा एस कारने टोल टाळण्यासाठी लाईन ओलांडली. यादरम्यान,टोल कर्मचाऱ्याने चालकाला गाडी थांबवण्यास सांगितले.तेव्हा त्याने गाडी न थांबवता उलट कर्मचाऱ्याला चिरडून गाडी भरधाव पुढे नेली.यात टोल कर्मचारी गंभीर जखमी झाला.त्यानंतर त्याला शहरातील एका खाजगी रुग्णालयात दाखल करण्यात आले असून त्याच्यावर आयसीयूमध्ये उपचार सुरू आहेत.पोलिसांत तक्रार दाखल होताच कार चालकाचा शोध घेतला जात आहे.