दारूच्या आहारी गेलेल्या पोटच्या मुलाची बापाने केली हत्या..

चंद्रपूर :-दिवसेंदिवस अल्पवयीन मुलांसह,युवक, वयोवृध्द दारूच्या आहारी जाऊन स्वतःची तसेच कुटुंबाची बर्बादी करू लागले आहेत.काहीजण दारू ढोसून आपल्याच घरच्यांना त्रास देऊ लागले आहेत. एखादेवेळी डोक्याच्यावर गेले तर अनुचित प्रकार घडत असतो.असाच प्रकार चंद्रपूर जिल्ह्याच्या मूल तालुक्यातील येसगाव येथे काल,सोमवारी २१ एप्रिलच्या रात्री ८ वाजताच्या सुमारास दारूच्या आहारी गेलेल्या मुलाने आईला मारहाण सुरु केल्याने वडील आडवे गेले असता त्यांनाही मारहाण केली असता,वडीलाने स्वतःच्या संरक्षणाकरिता बैलबंडीच्या उभारीने मुलाच्या डोक्यावर प्रहार केला.यामध्ये मुलाचा जागीच मृत्यू झाला.३५ वर्षीय चंद्रशेखर नागेंद्र वाढई,रा.येसगाव,ता.मूल,जि.चंद्रपूर असे मृत तरुणाचे नाव असून पोलिसांनी आरोपी वडील नागेंद्र पांडुरंग वाढई वय ६५ वर्षे याला अटक केली आहे.

नागेंद्र वाढई यांना तीन मुले आहे.एकाचा काही वर्षापूर्वी मृत्यू झाला.एक मुलगा कामानिमित्त बाहेरगावी स्थायिक झाला तर अविवाहित मुलगा चंद्रशेखर व मृत मुलाचे दोन लहान मुल नागेंद्र सोबत राहतात.चंद्रशेखरला दारूचे व्यसन जडले.त्यामुळे दररोज भांडण करीत आई-वडीलांना मारहाण करायचा.काल सोमवारी आई भेजगाव येथे आठवडी बाजार करून परत आल्यानंतर दारूच्या नशेत अंगणात झोपलेल्या चंद्रशेखरने आईसोबत भांडण करून मारहाण केली.घर पेटवून देण्याची धमकीही देत होता.दरम्यान वडील नागेंद्र वाढई आले. चंद्रशेखरला समजावण्याचा प्रयत्न केला.त्याने वडीलांनाही मारहाण सुरु केली.जीव वाचविण्याच्या प्रयत्नात बैलबंडीच्या उभारीने चंद्रशेखरच्या डोक्यावर प्रहार करताच तो जागीच गतप्राण झाला.