चालत्या गाडीत चढतांना पाय घसरून रेल्वेखाली आल्याने शरीराचे दोन तुकडे..

भंडारा :-जिल्ह्याच्या तुमसर रोड रेल्वेस्थानकावर भयावह घटना काल,बुधवार ९ एप्रिल रोजी सकाळच्या सुमारास घडली.रेल्वे प्रवासादरम्यान ४८ वर्षीय प्रवासी तुमसर रोड रेल्वेस्थानकावर पिण्याच्या पाण्याची बॉटल खरेदी करण्यासाठी उतरला. तितक्याच रेल्वेगाडी सुरू झाली.गाडी सुरू असतांनाच गाडीत चढता-चढता त्याचा पाय घसरून रेल्वेखाली आल्याने शरीराचे दोन तुकडे झाले.सदरची घटना तुमसर रोड रेल्वेस्थानकावरील प्लॅटफॉर्म क्रमांक-१ वर घडली असून गोविंद कुमार वय ४८ वर्षे रा.गुडगाव (हरियाणा)असे रेल्वे अपघातात मृत्युमुखी पडलेल्या प्रवाशाचे नाव आहे.निजामुद्दीन ते बिलासपूरकडे जाणाऱ्या गोंडवाना एक्स्प्रेस गाडीतून कुटुंबीयांसह दुर्ग येथे जात होते.प्रकरणी तुमसर रोड रेल्वे जीआरपीने गुन्हा दाखल केला.अपघाताच्या पंचनाम्यानंतर १५ मिनिटांनी रेल्वे पुढे निघाली. पोलिसांनी तुमसर उपजिल्हा रुग्णालयात प्रेत शवविच्छेदनासाठी पाठविले.दुपारनंतर नातेवाईक प्रेत घेऊन खाजगी वाहनाने दुर्गला रवाना झाले.घटनेचा पुढील तपास रेल्वे सुरक्षा बल करीत आहेत.