टिप्परचे चाक डोक्यावरून गेल्याने तरुण जागीच गतप्राण..

भंडारा :-खापा रामटेक राष्ट्रीय महामार्गावर ट्रक- दुचाकीच्या अपघातात तरुण जागीच ठार झाल्याची घटना काल,गुरुवारी २० मार्चच्या रात्री ८ वाजताच्या सुमारास भंडारा जिल्ह्याच्या तुमसर तालुक्यातील

काटेबाम्हणी येथील बस स्थानकासमोर घडली. टिप्परचे चाक डोक्यावरून गेल्याने तरुण जागीच गतप्राण झाला.मृताचे नाव सचिन मधुकर बालपांडे वय ३७, रा.दाभा-कोथूर्णा भंडारा असे आहे. अपघातात टिप्पर दुचाकीवरून गेल्याने गाडीसह युवकाचाही अक्षरशः चेंदामेंदा झाला.अपघात घडताच अज्ञात टिप्पर चालक घटनास्थळावरून पसार झाला. स्थानिकांनी वाहनाचा पाठलाग केला मात्र तो गवसला नाही.मिळालेल्या माहितीनुसार मृतक सचिन रामटेक मार्गे खापा करीता आपल्याच बाजूने दुचाकी क्रमांक- एम एच- ३६ आर-८३५८ ने निघाला होता.दरम्यान विरुद्ध दिशेने रामटेक धावणाऱ्या टिप्परने त्याला गाव शिवारातील हलक्या वळण मार्गावर धडक दिली. गावच्या मुख्य चौकात उपस्थितांनी घटना आपल्या डोळ्यांनी बघितली.अशातच अज्ञात टिप्पर नागरिकांनी पाठलाग केला असता पाठलाग करणाऱ्यांना टिप्पर गवसले नाही.मात्र घटनेची माहिती पोलिसांना देऊनही तब्बल ४० मिनिटे लोटूनही यंत्रणेने घटनास्थळ गाठले नसल्याचा संताप स्थानिकांनी व्यक्त केला.