शेतातील विहिरीत आढळला बिबट्या मृतावस्थेत..

चंद्रपूर :-चिमूर वनपरिक्षेत्रातील मुरपार उपक्षेत्रातील मिनझरी शिवारातील शेतातील विहिरीमध्ये पडून, एका बिबट (मादी) चा मृत्यू झाल्याची घटना काल सोमवारी उघडकीस आल्याने परिसरात एकच खळबळ उडाली आहे.चिमूर तालुक्यातील मिनझरी गावापासून एक किलोमिटर अंतरावर प्रकाश श्रीराम पोहनकर यांचे शेत आहे.काल सोमवारी सकाळी मिनझरी नियतक्षेत्राचे वनरक्षक आपल्या सहकाऱ्यांसह गस्त घालत होते.दरम्यान,त्यांना पोहनकर यांच्या शेतातील विहिरीमध्ये बिबट पडून मृत्यू झाल्याचे सकाळच्या सुमारास दिसून आले.सदर घटनेची माहिती वनपरिक्षेत्र अधिकारी (प्रादेशिक) चिमूर यांना मिळताच ते चमुसह घटनास्थळी दाखल झाले.त्यांनी सदर घटनेची पाहणी केली असता,बिबट मादी ही विहिरीमध्ये मृतावस्थेत आढळून आली.ब्रम्हपुरी वनविभाग उपवनसंरक्षक,ब्रम्हपुरी वनविभाग सहाय्यक वनसंरक्षक (तेंदू) यांना देण्यात आली. मानद वन्यजीव रक्षक तसेच पर्यावरणवादी मंडाळाचे प्रतिनिधी घटनास्थळी हजर झाल्यावर त्यांच्या समक्ष पंचनामा करण्यात आला.वन्यजीव (संरक्षण) अधिनियम १९७२ चे कलमान्वये वनगुन्हा दाखल करण्यात आला आहे.मृत बिबट (मादी) चा शव वनविश्राम गृह खडसंगी येथे नेण्यात आला.सहाय्यक आयुक्त पशुसंवर्धन नागभीड,पशुधन विकास अधिकारी नागभीड व पशुधन विकास अधिकारी चिमूर यांच्याहस्ते सर्वासमक्ष शवविच्छेदन करुन रासायनिक विश्लेषणाकरिता विसेरा घेण्यात आला. तसेच त्याच ठिकाणी सर्वांसमक्ष त्याचे

दहन करण्यात आले.बिबट (मादी) चे अंदाजे वय ६ वर्षाचे असून; त्यांचे सर्व अवयव शाबूत होते. वन्यप्राणी बिबट (मादी) शिकारीच्या शोधात वन्यप्राण्यांच्या मागावर भटकत असतांना विहिरीत पडून पाण्यात बुडाल्यामुळे मृत पावला असावा,असा प्राथमिक अंदाज वन विभागाने वर्तवला आहे.