पाच दिवसांपासून बेपत्ता जवानाचा थांगपत्ता लागेना..!

भंडारा :-पाच दिवसांपासून रेल्वे प्रवासादरम्यान

बेपत्ता झालेल्या जवानाचा थांगपत्ता लागेनासा झाल्याने भारतीय सेनेचे अधिकारी,पत्नी तथा कुटुंबीयांची चिंता वाढलेली आहे.११ डिसेंबर २०२४ ला या जवानाचे लग्न झाले होते.भंडारा येथील गुड्डू मुकेश सिंग गौड वय २४ वर्षे हे भारतीय सेनेत असून सध्या ते लेह लद्दाख येथे कार्यरत आहेत.लग्न असल्याने ते सुट्टयांवर आले होते.११ डिसेंबर २०२४ ला दिल्ली येथे त्यांचे थाटात लग्न झाले.लग्नानंतर ते पत्नीसह भंडारा येथील घरी आले होते.सुट्टया संपल्याने परतीच्या प्रवासादरम्यान रात्री पत्नीसह भ्रमणध्वनीवर बोलत होते.आराम करायचे सांगून जवानाने फोन ठेवला व दुसऱ्या दिवशी दिल्लीला जाताच घरी फोन करण्याचे सांगितले.पण,दुसऱ्या दिवशी ते निजामुद्दीन रेल्वे स्थानकावर पोहचलेच नाही.संपूर्ण प्रवासी खाली उतरून पुढच्या प्रवासाला गेले,पण गुड्डू यांचे सामान जसेच्यातसे डब्यात होते. प्रवासादरम्यान अचानक भारतीय सेनेचा जवान गायब झाल्याने संपूर्ण यंत्रणा कामाला लागली आहे.घटनेचा तपास वरठी पोलिस ठाण्याचे पोलिस निरीक्षक नीलेश गिरी करीत आहेत.पोलिसांचा तपास सुरू असून,भारतीय सेनेचे सर्व अधिकारी व त्यांची टीम यांसह रेल्वे पोलिस लक्ष ठेवून आहेत.