४० हजाराची लाच भोवली; पाणीपुरवठा विभागातील अभियंता एसीबीच्या जाळ्यात..

भंडारा :-तडजोडी अंती ४० हजाराची लाच घेतांना

भंडारा जिल्हा परिषदेतील पाणीपुरवठा विभागात कार्यरत कनिष्ठ अभियंत्यास लाच लुचपत प्रतिबंधक विभागाने रंगेहाथ अटक केली आहे.सदरची कारवाई  आज,शुक्रवारी २८ फेब्रुवारीला करण्यात आली.सुहास पांडुरंग करेंजकर वय ५१ वर्षे असे कारवाई करण्यात आलेल्या अधिकाऱ्याचे नाव आहे.

माहितीनुसार,करेंजकर हे भंडारा जिल्हा परिषदेत पाणी पुरवठा विभागात कनिष्ठ अभियंता पदावर कार्यरत आहेत.जिल्हा परिषद पाणी पुरवठा विभागाकडून आरओ प्लान्ट बसविण्यात आले होते.त्या कामाचे ९ लाख ८० हजार रुपयांचे बिल थकले होते.१७ फेब्रुवारी रोजी तक्रारदार यांनी करंजेकर याला भेटून त्यांच्या बिलाबाबत विचारणा केली असता त्याने बिलावर सही करून बिल मंजूर करण्यासाठी बिलाच्या पाच टक्के रक्कम, ४९ हजार रुपये लाचेची मागणी केली होती.कंत्राटदाराने याची तक्रार भंडारा लाचलुचपत प्रतिबंधक विभागाकडे केली. तक्रारीवरून २५ फेबुरवारी रोजी पंचासमक्ष पडताळणी केली असता पडताळणी दरम्यान आरोपी करंजेकर याने तडजोडअंती ४० हजार रुपयांची मागणी पंचासमक्ष केल्याचे निष्पन्न झाले.त्यानुसार आज शुक्रवारी सापळा कारवाई दरम्यान आरोपी सुहास करंजेकर याने पंचासमक्ष कंत्राटदाराकडून ४० हजार रुपये लाच रक्कम स्वीकारली.त्याच्याविरोधात भंडारा पोलिस ठाण्यात गुन्हा दाखल करण्यात आला आहे.त्याच्या घराची झडती घेण्याचे काम सुरू करण्यात आले.तसेच त्याचा मोबाईल ताब्यात घेण्यात आला असून पुढील निरीक्षण करण्यात येणार आहे.