सेवानिवृत्त केंद्रशाळा प्रमुखाचा खून; आरोपी अटकेत..

चंद्रपूर :-जिल्ह्याच्या मूल तालुक्यात एका ६० वर्षीय माजी केंद्रशाळा प्रमुखाचा खून झाल्याची घटना काल शुक्रवाच्या रात्री घडली असून आज,शनिवार २७ सप्टेंबर रोजी सर्वत्र उघडकीस आली.सुनिल कालीदास गेडाम वय ६० वर्षे,रा.टेकाडी,ता.मूल, जि.चंद्रपूर असे खून झालेल्या सेवानिवृत्त केंद्रशाळा प्रमुखाचे नाव आहे.तर त्याच गावातील रहिवासी किस्मत मोहम्मद अली सय्यद वय २४ वर्षे असे अटकेतील आरोपीचे नाव आहे.सदरची हत्या ही हात उसनवारीने दिलेल्या पैश्याच्या वादातून झाल्याचे पोलीस तपासात निष्पन्न झाले आहे.

मूल तालुक्याच्या टेकाडी येथील सुनिल गेडाम यांनी

काही महिन्यांपूर्वी आरोपी किस्मत मोहम्मद अली सय्यद यास ६ लाख रुपये हात उसनवारीने दिले होते.बरेच महिने लोटूनही दिलेली रक्कम परत मिळत नसल्याने सुनिल गेडाम यांनी आरोपीकडे रक्कम परत मिळण्याचा तगादा लावला होता.त्यामुळे आरोपी किस्मतने काल शुक्रवार २६ सप्टेंबरच्या रात्री काही काम असल्याचे सांगून सुनिल गेडाम यांना गावनजीक परिसरात नेले. तिथून मूल शहराच्या एमआयडीसी परिसरात जाताच दोघांमध्ये पैश्यावरून वाद झाला.वाद सुरू असतांनाच आरोपी किस्मत मोहम्मद अली सय्यदने सुनिल गेडाम यांच्या डोक्यात लोखंडी सळाखीने वार केला.यात सुनील गेडाम यांचा घटनास्थळीच मृत्यू झाला.मृत्यू होताच आरोपीने मृतदेह मरेगाव-टेकाडी मार्गावरील नाल्यात फेकून पसार झाला.रात्र होऊनही वडील घरी आले नसल्याने मुलाने मूल पोलिसांकडे मिसिंगची तक्रार दाखल केली.लागलीच पोलिसांनी तात्काळ शोधमोहीम सुरू केली.दरम्यान,आकापूर गावाजवळ मृतकाची दुचाकी, मोबाईल,चष्मा व चप्पल आढळून आली.त्यानुसार मूल पोलिसांनी संशयित आरोपी म्हणून किस्मत अलीला ताब्यात घेतले.त्याची विचारपूस केली असता सुरुवातीला त्याने उडवाउडवीची उत्तरे दिली. पोलिसी हिसका दाखविल्यानंतर त्याने गुन्ह्याची कबुली देत खून केल्याचे सांगितले.त्यानुसार पोलिसांनी नाल्यात फेकलेला मृतदेह ताब्यात घेऊन उपजिल्हा रुग्णालय मूल येथे उत्तरीय तपासणीसाठी पाठविला.प्रकरणी आरोपी किस्मत मोहम्मद अली सय्यद विरुद्ध मूल पोलीस ठाण्यात भारतीय न्याय संहिता कलम १०३ नुसार खुनाचा गुन्हा दाखल करण्यात आला आहे. घटनेचा पुढील तपास उपविभागीय पोलीस अधिकारी सत्यजित आमले,मूल पोलीस ठाण्याचे ठाणेदार विजय राठोड यांच्या मार्गदर्शनाखाली एपीआय सुबोध वंजारी करीत आहेत.