वकिलाने राहत्या घरीच घेतला गळफास; बारा दिवसांत दोन वकिलांच्या आत्महत्या..

चंद्रपूर :-जिल्ह्याच्या राजुरा शहरातील एका ४० वर्षीय वकिलाने स्वतःच्या राहत्या घरीच गळफास घेऊन आत्महत्या केल्याने परिसरात एकच खळबळ उडाली आहे.अवघ्या बारा दिवसांच्या अंतराने दुसरी आत्महत्येची आणि तेही वकिली पेशातील इसमांनीच आत्महत्या केली आहे.ॲड.नितीन वासाडे वय ४० वर्षे, रा.जवाहरनगर,राजुरा असे आत्महत्या केलेल्या वकिलाचे नाव असून ते भाजपचे राजुरा शहर उपाध्यक्ष होते. सदरची घटना ही काल रविवारी सायंकाळच्या सुमारास उघडकीस आली.नितीन यांनी १५ दिवसांपूर्वीच आपल्या घराचे नूतनीकरण करून कार्यक्रम केला होता.नेमकी कोणत्या कारणांनी नितीन यांनी आत्महत्या केली,याचे कारण अद्याप स्पष्ट होऊ शकले नाही.राजुरा शहरातील एवढ्यातील गळफास घेऊन आत्महत्या केल्याची ही दहावी घटना आहे,तर शहरातील बारा दिवसातील ही दुसऱ्या वकिलाची आत्महत्या आहे.यापूर्वी २४ फेब्रुवारी रोजी ॲड.अमित जयपूरकर यांनी घरीच गळफास घेऊन आत्महत्या केली होती.मृतक वासाडे हे पत्नी व १२ वर्षाच्या मुलीसह जवाहरनगरात वास्तव्यास होते.पत्नी रेल्वेमध्ये कंत्राटी कर्मचारी असून पत्नी नोकरीवर तर मुलगी शिकवणी वर्गाला गेली होती.पत्नी सायंकाळी घरी परत आली असता पती नितीन हे खोलीत लटकलेल्या अवस्थेत दिसून आले.लागलीच घटनेची माहिती शहर पोलिसांना देण्यात आली.पोलिसांनी घटनास्थळ गाठून पंचनामा केला व मृतदेह उत्तरीय तपासणीसाठी रुग्णालयात पाठवला.प्रकरणाचा पुढील तपास राजुरा पोलीस प्रशासन करीत आहे.