उद्रेक न्युज वृत्त
चंद्रपूर :-चिमूर वन परिक्षेत्रातील वनरक्षक ऋषी वानोसा हजारे वय ५६ वर्षे हे रात्रपाळीत गदगाव येथील जनार्धन रामचंद्र सातपुते यांच्यासह २४ जानेवारी रोजी बुधवारी गस्तीवर होते.गदगाव-उरकुडपार मार्गावरील शेताजवळील शेकोटी शेकत असतांना रात्री अकरा वाजताच्या सुमारास तिरखुरा येथील ट्रॅक्टर मालक तसचे महसूल कर्मचाऱ्यांनी रेतीच्या गाड्या चालू देत नाही, म्हणून मारहाण करून जिवे मारण्याची धमकी दिली.रेतीतस्कराची जिल्ह्यात किती मुजोरी वाढली आहे.याचा प्रत्यय आला आहे.
चिमूर तालुक्यातील महसूल तसेच वनक्षेत्रातील नदी, नाले,ओढ्यातून मोठ्या प्रमाणात अवैध रेती उत्खनन करून वाहतूक केल्या जात आहे. रेतीतस्करांचा तालुक्यात मुक्तसंचार असुन शेतकरी, सामान्य नागरीक,कर्मचाऱ्यांना साम दाम दंड भेद याचा वापर करून शांत बसविले जात आहे.राजकीय वरदहस्ताने या तस्करांची मुजोरी वाढली आहे.वन परीक्षेत्र चिमूर येथील गदगाव बिट येथे वनरक्षक ऋषी हजारे जंगल क्षेत्रात रेतीतस्करी,शिकारावर आळा घालण्यासाठी बुधवारच्या रात्री जंगल क्षेत्रात गदगाव येथील ओळखीच्या जनार्धन सातपुते यांना घेऊन गस्त घालीत होते.यादरम्यान गदगाव – उरकुडपार मार्गावर रात्रीच्या सुमारास तिरखुरा येथील ट्रॅक्टर मालक सोनू अशोक धाडसे व चिमूर येथील महसूल कर्मचारी राकेश झिरे हे दुचाकींनी उरकुडपारकडून आले. सोनू धाडसे याने अश्लिल शिवीगाळ करीत रेती वाहतुकीच्या गाड्या का थांबविल्या म्हणून विचारू लागला.त्यांवर वनरक्षक हजारे यांनी कोणाच्याही गाड्या चालू देणार नसल्याचे उत्तर दिले.त्यावर राकेश झिरे यांनी शिवीगाळ केली व दोघांनीही धक्का मारीत शेतातील बांधीत पाडले आणि लाथा बुक्यानी मारून पाहून घेण्याची धमकी दिली.
जनार्धन सातपुते यांनी मध्यस्थी करत दोघांचा वेगळे केले.त्यामुळे जिवे मारण्याची धमकी देत दोघेही निघुन गेले.याची माहिती वनपरीक्षेत्र अधिकारी किशोर देऊळकर यांना दिली. लगेच त्यांनी वनरक्षक अक्षय मेश्राम, अमोल पोटे, वनपाल रामदास नैताम व उद्धव लोखंडे यांच्यासह घटनास्थळ गाठले. वनरक्षकासोबत चिमूर पोलिस स्टेशनमध्ये तक्रार देण्यात आली.तक्रारीवरून सोनू धाडसे व राकेश झिरे यांच्यावर भारतीय दंड संहिताच्या कलम ३५३,२९४, ५०६,३४ अन्वये गुन्हा दाखल करण्यात आला असुन पुढील तपास सुरू आहे.
