‘या’ जिल्ह्यात ‘मुख्यमंत्री लाडकी बहीण योजना’ अर्ज पडताळणीला सुरुवात.. – पहिल्यांदा चारचाकी वाहने असलेल्या लाभार्थ्यांची तपासणी..

गोंदिया :-मुख्यमंत्री माझी लाडकी बहीण योजनेची सुरुवात झाल्यापासून निकषात बसत नसलेल्या महिलांकडूनही लाभ घेण्याचा प्रकार शासनाच्या निदर्शनास आल्याने आता शासन स्तरावरून ठोस पावले उचलून मुख्यमंत्री माझी लाडकी बहीण योजनेचा लाभ घेत असलेल्या महिलांच्या अर्जाच्या पडताळणीला सुरुवात झाली आहे.बरेच पात्र नसणारे लाभार्थीसुद्धा या योजनेचा लाभ घेत आहेत.त्यामुळे आता अर्जाची पडताळणी करून त्यांना अपात्र करण्याची प्रक्रिया सुरू करण्यात आली.काल, शुक्रवारी गोंदिया जिल्हा महिला व बालकल्याण विभागाला चारचाकी वाहने असणाऱ्या ४० लाभार्थी महिलांची यादी प्राप्त झाली आहे.याची पडताळणी करून अहवाल पाठविला जाणार आहे.

मुख्यमंत्री माझी लाडकी बहीण योजनेच्या निकषांनुसार पात्र व अपात्र असलेल्या लाभार्थीची पडताळणी करतांना पहिल्यांदा चारचाकी वाहने असलेल्या लाभार्थ्यांची तपासणी केली जात आहे.त्यानंतर ज्या लाभार्थी कुटुंबातील सदस्यांकडे चारचाकी वाहन आहे,अशांची पडताळणी होईल. विशेष म्हणजे या योजनेचा लाभ घेण्यासाठी चारचाकी वाहन व नोकरीवर असलेल्या महिलांनीसुद्धा अर्ज केले होते.त्यांनी अनुदानाची उचलसुद्धा केली आहे.पण ही बाब शासनाच्या निदर्शनास आल्यानंतर आता अशा लाभार्थ्यांच्या अर्जाची पडताळणी करण्यास सुरुवात करण्यात आली.बऱ्याच लाभार्थ्यांनी या योजनेचा लाभ घेण्यासाठी अर्जासह खोटी कागदपत्रे जोडल्याचेसुद्धा पुढे आले.त्यामुळे अर्जासह जोडलेल्या कागदपत्रांची पडताळणी करण्यास सुरुवात केली आहे.काल शुक्रवारी शासनाकडून जिल्हा महिला व बालकल्याण विभागाला चारचाकी वाहने असणाऱ्या ४० लाभार्थ्यांची यादी प्राप्त झाली. या यादीतील नावांची पडताळणी करून माहिती शासनाला पाठविण्यात येणार आहे.त्यानंतर पुढील कारवाई केली जाणार असल्याचे या विभागाच्या अधिकाऱ्यांनी स्पष्ट केले आहे.