ट्रक आणि पिकअप वाहनाची समोरासमोर जोरदार धडक; सहा जणांचा जागीच मृत्यू,तर सात जण गंभीर जखमी..

गोंदिया :-गोंदिया-बालाघाट राष्ट्रीय महामार्गावर एक भीषण अपघाताची घटना समोर आली आहे.गोंदिया-बालाघाट मार्गावरील नागरा परिसरात एका भरधाव ट्रक आणि पिकअप वाहनाची समोरासमोर जोरदार धडक झाल्याने घडलेल्या अपघातात तब्बल सहा जणांचा जागीच मृत्यू झाला,तर सात जण गंभीर जखमी झाल्याची घटना काल सोमवारी दुपारच्या सुमारास घडली,मात्र आज मंगळवारी सर्वत्र उघडकीस आली आहे.अपघातात मृत पावलेले मध्य प्रदेशाच्या बालाघाट जिल्ह्यातील किरणापूर परिसरातील रहिवासी असल्याची माहिती समोर आली आहे. भीषण अपघातात ३ वर्षीय आरुष मात्रे रा.सावरी, किरण संतोष वैद्दे वय २६ वर्षे, रा.लोडाना,संतोष मात्रे वय ३८ वर्षे,सुशिला मात्रे वय ३५ वर्षे,दोघेही रा.किन्ही,रुपसेन सत्यकर वय ३५ वर्षे आणि ज्योती सत्यकर वय ३२ वर्षे अशी मृतकांची नावे आहेत. तर लक्ष्मी पंचाल वय २७ वर्षे,संतोष वैद्दे वय ३५ वर्षे, राकेश बाहे वय २४ वर्षे,भुमेश्वर मात्रे वय ४७ वर्षे,संगीता मात्रे वय ३५ वर्षे,राजेंद्र पंचाले वय ३० वर्षे व चालक संदीप बाहे अशी अपघातात गंभीर जखमी झालेल्यांची नावे आहेत.जखमींवर सध्या गोंदिया जिल्हा सामान्य रुग्णालयात रुग्णालयात उपचार सुरू आहेत.

माहितीनुसार,मध्य प्रदेशाच्या बालाघाट जिल्ह्यातील किरणापूर परिसरातील रहिवासी असलेले १३ कामगार एमपी १५ टी ३४९५ क्रमांकाच्या पिकअप वाहनाने तेलंगणातील जगतीहाल,करीमनगर येथे रोजगारासाठी निघाले होते.दरम्यान,गोंदिया-बालाघाट मार्गावरील नागरा परिसरात एमएच ३५ एजे २५४७ क्रमांकाचा एक ट्रक वेगात गोंदियाकडून येत असतांनाच दोन्ही वाहनांची समोरासमोर जोरदार धडक झाली.धडक इतकी भीषण होती की,पिकअप वाहनाचा अक्षरशः चेंदामेंदा झाला. यातच तब्बल सहा जणांचा जागीच मृत्यू झाला. अपघाताचा भीषण आवाज ऐकू येताच परिसरातील नागरिकांनी घटनास्थळी धाव घेत मदतकार्य सुरू करून पोलिसांना पाचारण केले.गोंदिया ग्रामीण पोलिसांनी तात्काळ घटनास्थळी धाव घेत वाहनात अडकलेल्या  जखमींना बाहेर काढून रुग्णवाहिकेद्वारे गोंदिया जिल्हा सामान्य रुग्णालयात दाखल केले.सध्या जखमींवर उपचार सुरू असून पोलिसांकडून अपघाताची नोंद करण्यात आली व पुढील तपास सुरू करण्यात आला आहे.पोटाची खळगी भरण्यासाठी निघालेल्या कामगारांवर अचानक ओढवलेल्या संकटाने परिसरात हळहळ व्यक्त केली जात आहे.