आरोग्य सेवक व वरिष्ठ लिपिक एसीबीच्या जाळ्यात..

गोंदिया :-जिल्हा हिवताप कार्यालयातील आरोग्य सेवक व वरिष्ठ लिपिकाने नक्षल प्रोत्साहन भत्त्याचे एरियस बिल काढण्यासाठी लाचेची मागणी केल्याप्रकरणी गोंदियाच्या लाच लुचपत प्रतिबंधक विभागाने(एसीबी)७ हजार रुपयांची लाच मागणी करणारा व त्यास प्रोत्साहन देणाऱ्यास रंगेहाथ पकडले.मारोती यादव दिपेवाड वय-३९ वर्षे,पद-आरोग्य सेवक,जिल्हा हिवताप कार्यालय गोंदिया, वर्ग-३,रा.पारधी हॉउस न्यु लक्ष्मीनगर बाहेकर नर्सिंग होम जवळ गोंदिया ता.जि.गोंदिया,मुळ पत्ता रा.हरडफ,ता.माहुर,जि.नांदेड व निरजकुमार नरेश अग्रवाल वय-४० वर्षे,पद-वरिष्ठ लिपीक,जिल्हा हिवताप कार्यालय गोदिया,वर्ग-३,रा.अंगुर बगिचा रोड,मारोती अपार्टमेंट गोंदिया,ता.जि.गोंदिया अशी आरोपींची नावे आहेत.

४३ वर्षीय पुरुष तक्रारदार यांचे वडील हे जिल्हा हिवताप विभागातुन आरोग्य सेवक या पदावरुन नियमित वयोमानाने सन-२०१६ मध्ये सेवानिवृत्त होउन फेब्रुवारी-२०२६ मध्ये मरण पावले आहेत.वडिलांचे मृत्यु नंतर तक्रारदार हे त्यांचे आई सोबत कुटुंब निवृत्ती वेतनाबाबत माहिती विचारण्याकरीता मार्च-२०२६ मध्ये जिल्हा हिवताप कार्यालय,गोंदिया येथे गेले असता वरिष्ठ लिपीक निरजकुमार अग्रवाल यांनी तक्रारदार यांना तुमच्या वडिलांचा नक्षल प्रोत्साहन भत्त्याचे एरियस बिल देखील आहे,ते काढून देतो.त्यासाठी ६ हजार रुपये द्यावे लागतील,असे सांगीतले.त्यानंतर,तक्रारदार परत त्यांच्या वडीलांचे नक्षल प्रोत्साहन भत्त्याचे बिल निघाले नसल्यामुळे जुन-२०२६ मध्ये आरोपी निरजकुमार अग्रवाल यांना भेटण्यास गेले असता त्यांनी त्यांचे कार्यालयातील आरोग्य सेवक मारोती दिपेवाड यांना भेटण्यास सांगितले.तक्रारदार दिपेवाड यांना भेटले असता त्यांनी सुध्दा तक्रारदार यांना नक्षल प्रोत्साहन भत्त्याचे एरियस बिल काढुन देण्याकरीता ७ हजार रुपये लाचेची मागणी केली.त्यानंतर,२१ ऑगस्ट रोजी तक्रारदार यांनी दिपेवाड यांना एरियस बिल बाबत पुन्हा विचारणा केली असता त्यांनी तक्रारदार यांना ७ हजार रुपये द्यावे लागतील,असे म्हणुन लाचेची मागणी केली. तक्रारदार यांना लाच देण्याची इच्छा नसल्याने त्यांनी २४ ऑगस्ट २०२६ रोजी लाच लुचपत प्रतिबंधक विभाग गोंदिया येथे तक्रार दिली.त्यानुसार,२४ ऑगस्ट २०२६ रोजी तक्रारदार यांना पंच व डिजीटल व्हाइस रेकॉर्डर सह आरोपी मारोती  दिपेवाड व आरोपी निरजकुमार अग्रवाल यांच्याकडे जिल्हा हिवताप कार्यालय येथे लाच मागणी पडताळणी कामी पाठवले असता दिपेवाड यांनी तक्रारदार यांच्या वडीलांचे नक्षल प्रोत्साहन भत्त्याचे बिलाचे एरियस काढून देण्याकरीता ७ हजार रुपयाची मागणी करून ती स्वीकारण्याची तयारी दर्शवली.तसेच आरोपी निरजकुमार अग्रवाल यांनी त्यास प्रोत्साहन दिले. त्यानंतर काही वेळातच सापळा कारवाई करण्यात आली आणि मारोती दिपेवाड यांना पांचासमक्ष रंगेहाथ पकडण्यात आले.त्यातच प्रोत्साहन देणारे अग्रवाल यांच्यावरही कारवाई करण्यात आली.दोन्ही आरोपींविरोधात भ्रष्टाचार प्रतिबंधक अधिनीयम १९८८(सुधारणा २०१८) अन्वये पोलीस स्टेशन केशोरी,जि.गोंदिया अप.क्र.६९१/२६ कलम ७,१२ नुसार गुन्हा नोंद करण्यात आला व काल मंगळवारी दोन्ही आरोपींना न्यायालयात हजर केले असता न्यायालयाने दोघांचीही कारागृहात रवानगी करण्यात आली.