उद्रेक न्युज वृत्त
चंद्रपूर :- जिल्ह्यातील प्रसिद्ध आनंदवनात मागील आठवड्यात झालेल्या युवतीच्या हत्या प्रकरणातील आरोपीने पोलिस कोठडीत आत्महत्या केल्याची खळबळजनक घटना घडली.आत्महत्या केलेल्या आरोपीचे नाव समाधान माळी असे आहे.वरोरा येथे २६ जून रोजी आरती दिगंबर चंद्रवंशी वय २४ वर्षे या युवतीची हत्या करण्यात आली होती.पोलिसांनी तातडीने तपासाची चक्रे फिरवित आरोपी समाधान माळी याला २४ तासात अटक केली.
आरतीच्या हत्येमागे लव्ह,ब्रेकअप,मर्डर असे वळण असल्याचे पोलिस तपासात समोर आले.आरोपी समाधानला न्यायालयाने सात दिवसांची पोलिस कोठडी सुनावली होती.आरोपी समाधान माळी हा कुष्ठरोगी असून,तो एक वर्षाआधी आनंदवनात उपचाराला आला होता.तिथेच त्याचा परिचय आरतीशी झाला.दोघेही एकमेकांच्या प्रेमात पडले. दरम्यान,आरोपीने रात्री पोलिस कोठडीत गळफास घेत आत्महत्या केली.यामुळे पोलिस विभागात खळबळ उडाली आहे.
काल,२९ जून ला आरोपी समाधान माळीवर बलात्काराचा गुन्हा सुद्धा दाखल करण्यात आला होता; समाधानने आरतीची हत्या करण्यापूर्वी तिच्यावर बलात्कार केला होता.गुन्हा केल्यावर समाधान कुठेही पळून गेला नव्हता; पोलिसांनी समाधानला आनंदवनमधून अटक केली.मात्र,गुन्हा केल्यावर तो नैराश्यात गेला होता.
त्या नैराश्यातून त्याने आज,३० जून रोजी सकाळी स्वतःच्या जोड्याच्या लेस ने गळफास घेतला.विशेष म्हणजे आरोपीला २४ तासाच्या आत अटक केली म्हणून पोलिस स्वतःची पाठ थोपटवीत होते.मात्र आरोपीने आत्महत्या केल्यावर पोलिसांचे बोट एकमेकांवर उठत आहे.पोलिसांच्या चुकीमुळे सदर प्रकार घडला असून आता या प्रकरणाचा तपास सीआयडी कडे गेला आहे.
