उद्रेक न्युज वृत्त
भंडारा :-जिल्ह्यात मुसळधार पाऊस सुरू असताना भंडारा जिल्हाधिकारी कार्यालयात मात्र,आग लागल्याची घटना शनिवारी दिनांक-सकाळी ९ वाजताच्या सुमारास घडली.इलेक्ट्रिक पॅनलमध्ये शॉर्टसर्किट होऊन वायरिंग जळाल्याने सर्वत्र धूर पसरला होता.ही बाब लक्षात येताच लगेच महावितरणचे वीज कर्मचारी व पालिकेच्या अग्निशमन दलाला सूचना देऊन पाचारण करण्यात आले.वीज कर्मचाऱ्यांनी वीजपुरवठा खंडित केला,तर अग्निशमन दलाने काही क्षणातच आगीवर नियंत्रण मिळविल्याने मोठा अनर्थ टळला.भंडारा जिल्हाधिकारी कार्यालयाच्या इमारतीमध्ये विविध विभागाचे स्वतंत्र कक्ष आहेत.या कक्षाबाहेरील भिंतीवर इलेक्ट्रिक पॅनल लावलेले असून याच ठिकाणावरून संपूर्ण कार्यालयातील वीजपुरवठ्याचे नियंत्रण व संचलन केले जाते.येथे मेनस्वीच व अन्य बोर्डसुद्धा लावलेले आहेत.त्यातील एका बोर्डात शॉर्टसर्किट होऊन धूर निघू लागला.पाहता पाहता हा धूर लगतच्या सर्वच कक्षात पसरला.शनिवार सुटीचा दिवस असून सध्या महसूल कर्मचाऱ्यांचा संप सुरू आहे.त्यामुळे कार्यालयात कर्मचारी नव्हते.तेथे असलेल्या सुरक्षा रक्षकांच्या लक्षात हा प्रकार येताच त्याने वरिष्ठ अधिकाऱ्यांना कळविले.अग्निशामक दल आणि वीज वितरण कर्मचाऱ्यांनासुद्धा घटनेची माहिती देण्यात आली.ही आग शॉर्टसर्किटमुळे लागली असावी; असा प्राथमिक अंदाज आहे.
