‘माझी पत्नी प्रयागराजला गेली आहे,तू घरी ये,एक हजार रुपये देतो; शिक्षकाचा कारनामा..! – विद्यार्थिनीच्या वडीलांसह भावाने घर गाठत शिक्षकास बदडवले..

चंद्रपूर :-शिक्षक आणि विद्यार्थ्यांचे नाते पवित्र मानले जाते.मात्र,मागील काही वर्षांमध्ये या नात्यामध्येही काही शिक्षकांकडून काळिमा फासण्याचा प्रयत्न केला जात आहे.एखादा शिक्षकच नात्याला काळिमा फासून वाईट कृत्य जर कां करीत असेल तर आई-वडिलांनी मुलांना शाळेत पाठवणे सोडावे काय? असा प्रश्न निर्माण झाला आहे.अशातच चंद्रपूर जिल्ह्याच्या वरोरा शहरात खळबळजनक घटना उघडकीस आली आहे. चक्क एका शिक्षकाने विद्यार्थिनीला अश्लील मॅसेज पाठवल्याने विद्यार्थिनीचे वडील तसेच भावाने थेट शिक्षकाचे घर गाठून चांगलेच बदडवले.बदनामी होईल,या भीतीने विद्यार्थिनीच्या कुटुंबीयांनी पोलिसांत

तक्रार देण्याचे टाळले.

माहितीनुसार,शिक्षकाने आपल्याच विद्यार्थिनीला मोबाइलवर ‘माझी पत्नी प्रयागराजला गेली आहे,तू घरी ये,एक हजार रुपये देतो’, असा मॅसेज केला.हा मॅसेज येताच तिने आपल्या कुटुंबीयांना दाखविला. शिक्षकाकडून असा मेसेज येणे अपेक्षित नसल्याने वडिलांसह भावाचाही पारा चढला आणि त्यांनी थेट शिक्षक राहत असलेल्या शहरातील ले-आउटमध्ये जाऊन शिक्षकाचे घर गाठले.त्यानंतर याबाबत जाब विचारण्यात आला.एवढेच नाही तर शिक्षकाला चांगलेच झोडपले.शिक्षक राहत असलेल्या परिसरातील नागरिकांनी सदरचा प्रकार पाहून सर्वजण अवाक् झाले.विशेष म्हणजे,यापूर्वीही याच शिक्षकाने एका विद्यार्थिनीची छेडछाड केली होती. याबाबतची तक्रार पोलिसांत करण्यात आली होती.तेव्हा शाळा व्यवस्थापनाने त्याला निलंबित केले होते.मात्र तरीही शिक्षकाने न सुधारता आपल्या विद्यार्थिनीली मॅसेज करून घरी बोलावले.त्यामुळे सर्वत्र संताप व्यक्त केला जात आहे.