मनोरुग्ण,निराधार,वेड्या लोकांचा आधार बनले समाजदूत परमेश्वर मडावी.. – लोकसहभागातून छत्रपती शिवाजी महाराज आश्रमाची निर्मिती.. – मुख्याधिकारी माधुरी मडावी यांच्या हस्ते लोकार्पण..

चंद्रपूर :-स्वतःचा विसर पडल्याने जगभराच्या वेदना सोबत घेऊन वन वन फिरणारी व्यक्ती म्हणजे मनोरुग्ण.! वेगवेगळ्या कारणाने मनोरुग्ण झालेल्यांना ते कोण, कुठले,हे भानच नसलेल्या मनोरुग्ण,निराधार,वेड्या लोकांचा आधार बनलेले समाज दूत परमेश्वर मडावी यांनी चंद्रपूर जिल्ह्याच्या नागभीड तालुक्यातील नांदेड येथे डोमाजी आधार फाउंडेशनची निर्मिती करून सामाजिक बांधिलकी जोपासली.त्या माध्यमातून लोकसहभागातून छत्रपती शिवाजी महाराज आश्रमाची (निवारागृह)निर्मिती केली.नुकतेच छत्रपती शिवाजी महाराजांच्या प्रेरणेतून या आश्रमाचे लोकार्पण माजी यवतमाळच्या मुख्याधिकारी माधुरी मडावी यांच्या हस्ते पार पडले.या कार्यक्रमाचे दीप प्रज्वलन कारंजाच्या मुख्याध्यापिका पूजा चल्लावार-शांतलवार यांनी केले. अध्यक्षस्थानी प्रयोगशाळा वैज्ञानिक अधिकारी डॉ.रवींद्र चल्लावर होते.तर प्रमुख अतिथी म्हणून श्रीलक्ष्मी पतसंस्थेचे अध्यक्ष विनोद बोरकर,माजी जिल्हा परिषद सदस्य खोजराम मरस्कोल्हे,यवतमाळच्या माजी मुख्याधिकारी माधुरी मडावी,तळोधी पोलीस स्टेशनचे ठाणेदार राहुल गुहे,सोनुलीचे माजी सरपंच प्रमोद गायकवाड,सामाजिक कार्यकर्ते सादिक शेख,शिक्षक विलास चल्लावार,पोलीस पाटील शितल इचकापे आदींची उपस्थिती होती.समाजातील उपेक्षित घटकांना सुरक्षित निवारा,अन्न,वस्त्र आणि मायेचा आधार मिळावा या उदात्त हेतूने लोकसहभागातून हे निवारागृह उभारण्यात आले आहे.बांधकामासाठी रविंद्र चल्लावार यांनी एक लाख रुपये राशीची मदत केली.याशिवाय सुनीता चाल्लावार-शांतलवार व सीमा राजेश्वर गावंडे यांनी प्रत्येकी ५० हजार रुपयांची मदत केली आहे. कार्यक्रमाचे संचालन व आभार माजी उपसरपंच दुर्वेश रामटेके यांनी केले.या कार्यक्रमाच्या यशस्वितेसाठी गावातील अनेक तरुणांनी सहकार्य केले.