उद्रेक न्युज वृत्त
चंद्रपूर :- प्रसिद्ध आनंदवनातील एका २४ वर्षीय तरुणीच्या निघृण हत्या प्रकरणी पोलिसांनी अटक केलेल्या आरोपीने पोलीस कोठडीच्या बाथरूममध्ये आत्महत्या केली.या घटनेने पोलिस प्रशासन हादरले असून पोलिस अधीक्षक मुमक्का सुदर्शन यांनी ३ कर्मचाऱ्यांवर निलंबनाची कारवाई केल्याने एकूणच हे प्रकरण चर्चेचा विषय ठरू लागला आहे.पोलिस हवालदार धनंजय वरगंटीवार,महिला पोलिस हवालदार मनीषा कुत्तरमारे व पोलिस शिपाई नितीन तुराळे असे निलंबन करण्यात आलेल्या कर्मचाऱ्यांची नावे आहेत.
चंद्रपूर जिल्ह्यातील वरोरा येथील आनंदवनात आरती चंद्रवंशी या तरुणीची प्रेमप्रकरणातून हत्या करणारा आरोपी समाधान माळीने बुटाच्या लेसने वरोरा पोलिस ठाण्याच्या कोठडीत असताना आत्महत्या केल्याची घटना काल,रविवार दि.३० जून ला सकाळच्या सुमारास उघडकिस आल्यावर ही वार्ता वाऱ्यासारखी पसरली.समाधानला ७ दिवसाची पोलिस कोठडी न्यायालयाने सुनावली होती.त्याच्यावर देखरेख ठेवण्याची जवाबदारी धनंजय,मनीषा व नितीन वर होती.ती योग्य रीतीने पाळण्यात आली नाही. पोलिसांना सीसीटीव्ही फुटेजमध्ये समाधान जोड्यांची लेस काढतांना दिसतो आहे.त्याची नोंद या तिघांनी घेतली नाही आणि अनर्थ घडला.त्या ३ कर्मचाऱ्यांवर हलगर्जीपणाचा ठपका ठेवून त्यांना निलंबित करण्यात आले.पुढील चौकशी करून अहवाल येई पर्यंत निलंबन कायम राहील; असे पोलीस अधीक्षक मुमक्का सुदर्शन म्हणाले.
