पंचायत समितीत ‘बोजारा’ दिल्याशिवाय फाईल पुढे सरकतच नाही..! – आमसभेत ‘बोजारा’ शब्दाने अधिकाऱ्यांचे चेहरे ताणले गेले…

भंडारा :-अनेकदा आपण अनेकांच्या तोंडून

ऐकत असतो की,माझा ‘बोजारा राहिला बरं..!’ नेमका ‘बोजारा’ म्हणजे काय? ‘बोजारा’ हा शब्द ग्रामीण बोलीभाषेतून प्रचलित झाला असला,तरी तो प्रमाण मराठीत सापडत नाही.पारंपरिक सणांमध्ये,विशेषतः पोळा व होळी दरम्यान, ‘बोजारा’ म्हणजे भेटवस्तू वा पैशांची मागणी असा अर्थ घेतला जातो.अशातच भंडारा जिल्ह्याच्या मोहाडी येथील पंचायत समितीच्या आमसभेत ‘बोजारा’ हा शब्द उपस्थितांच्या कानावर पडला अन् अनेकांचे चेहरे हास्याने फुलले व उपस्थित प्रतिनिधी खदखदायला लागले.मात्र, ‘बोजारा’ शब्दाने अधिकाऱ्यांचे चेहरे मात्र ताणले गेले.क्षणात चेहऱ्यांवरचा आनंदी भाव नाहीसा झाला.आमसभेत एका सदस्याने बोजारा दिल्याशिवाय फाईल पुढे सरकत नाही,असे म्हटले आणि प्रशासनामध्ये चालत असलेल्या ‘अर्थ’ कारणाची वास्तविकता समोर आली. यानंतर ‘बोजारा’ या शब्दाची चर्चा तालुक्यात सुरू झाली.त्यातच प्रशासनात कामे मार्गी लागण्यासाठी फायलींवर ‘वजन’ ठेवावे लागते, हीच ‘बोजारा’ शब्दाच्या वापरातील सूचकता आहे.पंचायत समितीच्या आमसभेत या शब्दाच्या उच्चाराने प्रशासनातील ‘अर्थ’ कारण उघड झाले आणि त्यावर तालुकाभर चर्चा रंगली आहे.आर्थिक वर्ष २०२४-२५ उद्या सोमवारी संपणार आहे.फायली सरकवायला वेग आला आहे.कामे पूर्णत्वास नेण्यासाठी प्रशासन गतिमान झाल्याचे दिसून येते.सरकारी कार्यालयांना तीन दिवस सुट्टी आहे.तथापि,फायलींचा पसारा दूर सारण्यासाठी अधिकारी सुट्टीतही कामाला लागले आहेत.अडलेल्या फायलींना पुढे ढकलण्यासाठी ‘बोजारा’ महत्त्वाचा ठरणार आहे.