प्राध्यापकाच्या वडिलाची नक्षलवाद्यांनी केली हत्या..

गडचिरोली :-मोठा मुलगा प्राध्यापक तर लहान मुलगा वकील व सून पोलीस शिपाई असलेल्या इसमाची नक्षलवाद्यांनी गळा दाबून हत्या केल्याची घटना काल,शनिवार २९ मार्चच्या रात्री गडचिरोली जिल्ह्याच्या भामरागड तालुक्यातील धोडराज पोलिस ठाण्यांतर्गत येणाऱ्या जुव्वी गाव परिसरात घडून आज,रविवार ३० मार्च रोजी सर्वत्र उघडकीस आल्याने परिसरात एकच खळबळ माजली आहे.पुसू गेब्बा पुंगाटी वय ६० वर्षे असे हत्या करण्यात आलेल्या इसमाचे नाव आहे.

माहितीनुसार,पुंगाटी कुटुंबीय काल शनिवारी जेवण करून झोपी गेले होते.अशातच रात्रीच्या सुमारास काही बंदूकधारी नक्षली जुव्वी गावात जाऊन पुसू पुंगाटी यांच्या घरी गेले.पुसू पुंगाटी यांना झोपेतून जागे करून गाव परिसर नजिक घेऊन गेले व पुसू यांना काही कळायच्या आतच नक्षलींनी त्यांची गळा दाबून  हत्या केली.घटनेबाबत कळताच कुटुंबीयांना मोठा हादरा बसला आहे.परत पुन्हा एकदा परिसरात नक्षलींची दहशत निर्माण झाल्याचे सदर प्रकारावरून दिसून येत आहे.पुसू पुंगाटी यांनी अत्यंत हलाखीच्या परिस्थितीला सामोरे जात दोन्ही मुलांना उच्चशिक्षित केले.त्यांना पत्नी आणि दोन विवाहित मुले असून मोठा मुलगा चिन्ना पुंगाटी हा एटापल्ली येथील राजे धर्मराव महाविद्यालयात प्राध्यापक म्हणून कार्यरत आहे.तर लहान मुलगा किशोर पुंगाटी हा अहेरी येथील अतिरिक्त जिल्हा व सत्र न्यायालयात वकिली करतो. प्रा.चिन्ना पुंगाटी यांची पत्नी पोलिस शिपाई आहे.पुसू पुंगाटी यांची नक्षलींनी हत्या कां केली? नक्षलींनी केली की अन्य अज्ञात इसमांनी केली? याबाबत तपास सुरू असल्याचे गडचिरोलीचे पोलीस अधीक्षक नीलोत्पल यांनी घटनेबाबत स्पष्ट केले आहे.