उद्रेक न्युज वृत्त
चंद्रपूर :- राजुरा शहरातील शैक्षणिक क्षेत्रात कार्यरत बापूजी पाटील मामुलकर प्रतिष्ठानच्या नुकत्याच झालेल्या निवडणुकीपुर्वी सदर निवडणुकीत आपल्याला सत्ता मिळावी; या लालसेपोटी संस्थेतील संचालकाने आपल्या नातलग व्यक्तींना सामिल करीत अन्य संचालकांच्या घरी जाऊन सोफ्यात काळा धागा बांधून हळद, कुंकू लावून काही अवांछनीय वस्तू ठेवल्या.सदर संचालक सायंकाळी घरी गेल्यानंतर या बाबींची वाच्यता होताच व काही लपवून ठेवलेल्या वस्तू निदर्शनाला आल्याने सर्वच घाबरून गेले. उपलब्ध सीसी टीव्ही वर हा सर्व प्रकार उघडकीस आला.या अंधश्रध्देला खतपाणी देणाऱ्या प्रकाराविषयी संस्थेचे चार संचालक अविनाश जाधव, डॉ.एस.एम.वारकड,प्रा.बी.यू.बोर्डेवार आणि संचालक दत्तात्रय येगिनवार यांचा मुलगा सचिन येगीनवार यांनी राजुरा पोलिस ठाण्यात तक्रार दाखल केली होती.अखेर काल सोमवारी राजुरा पोलिस स्टेशनमध्ये अपराध क्रमांक ०५९४ नुसार माजी जिल्हा परिषद सदस्य मेघा नलगे,प्रा.मयुरी नलगे,शिक्षिका शिल्पा भुते आणि अभिजित भुते यांच्यावर अघोरी प्रथा व जादूटोणा प्रतिबंध कायदा कलम ३ (१) व ३ (२ ) नुसार गुन्हा दाखल करण्यात आला.बापूजी पाटील मामुलकर प्रतिष्ठान या संस्थेतर्फे काही शाळा संचालित करण्यात येतात. या संस्थेचा कार्यकाळ पूर्ण झाल्याने सहाय्यक धर्मदाय आयुक्त चंद्रपूर यांच्या आदेशाने दिनांक १५ आक्टोंबर २०२३ ला निवडणूक घेण्यात आली.यापूर्वी आरोपींनी या संचालकांचे घरी जाऊन सोफ्यात हळद,कुंकू व काळा दोरा बांधलेल्या वस्तू लपवून ठेवल्या.मात्र सीसीटीवीमुळे बिंग फुटले. यानंतर तक्रारदारांनी सीसीटीव्ही फुटेज,ऑडीओ रेकार्डींग व सापडलेल्या वस्तू राजुरा पोलिस ठाण्यात जमा करण्यात केल्या.अंधश्रध्देच्या आहारी जाऊन गैरप्रकार केल्याने चार सुशिक्षित व्यक्तींवर गुन्हा दाखल झाल्यामुळे शहरात एकच खळबळ उडाली आहे. सदर प्रकरणाचा तपास ठाणेदार योगेश्वर पारधी करीत आहेत.
