उद्रेक न्युज वृत्त
भंडारा ( तुमसर) :- भंडारा जिल्ह्यातील तुमसर तालुक्यात खोटे दस्तऐवज तयार करून धान्य खरेदी केंद्रातील अपहार करण्याचे प्रकरण उघडकीस येऊ लागले आहेत.काही दिवसांपूर्वीच याच तालुक्यातील नाकाडोंगरी येथील धान खरेदी केंद्रात सुमारे चार कोटींचा अपहार झाल्याची शाई अजूनर्यंत वाळत नाही तोच पुन्हा; तुमसर तालुक्यातील आंबागड येथे आधारभूत धान खरेदी केंद्रात दोन कोटी ७१ लाख ३४ हजार रुपयांचा अपहार झाल्याची घटना उघडकीस आली आहे.जिल्हा पणन अधिकारी भारतभूषण पाटील यांनी आंधळगाव पोलिस ठाण्यात संबंधिताविरुद्ध तक्रार दाखल केल्यानंतर गुन्हा दाखल करण्यात आला आहे.यात एकूण १५ जणांचा समावेश असून दोन ग्रेडर यांना अटक करण्यात आली आहे.
अरविंद भगवान दास भुतांगे व स्वप्निल राजेश शामकुवर दोन्ही रा.आंबागड अशी अटक केलेल्या ग्रेडर यांची नावे आहेत.अन्य जणांवर गुन्हा दाखल केलेल्यांमध्ये राधेशाम तोलाजी रहांगडाले (अध्यक्ष), संचालक म्हणून गोपीचंद कवळु बावनकर, सुधीर चंदुलाल ठाकरे, संजय फत्तु कावळे, निलकंठ रतिराम मोरे, घनशाम झागडुसाव जांभुळपाने, राजेश सुखराम शामकुवर, नंदलाल डोमाजी रहांगडाले, बुधराज पंढरी पटले, श्रीपत अंतु कोकोडे, गणेश उदेसिंग पंचरे,रत्नमाला भगवान भुतांगे, सचिव अनिल तोलाजी रहांगडाले तर ग्रेडर अरविंद भगवानदास भुतांगे व स्वप्नील राजेश शामकुवर यांचा समावेश आहे.
विविध कार्यकारी सेवा सहकारी संस्था मर्यादित आंबागड,ता.तुमसर या नावाने असलेल्या संस्थेमध्ये असलेल्या १५ जणांनी संगनमत करून आंबागड येथे धान खरेदी केंद्र असलेल्या धान खरेदी हंगाम सन २०२१-२०२२ मध्ये खरीप हंगामाचे प्रत्यक्ष धान खरेदी न करता धान खरेदी केल्याचे खोटे दस्तऐवज तयार केले.
यातून शासनाची व मार्केटिंग फेडरेशन व शेतकऱ्याची दोन कोटी ७१ लाख ३४ हजार ४३८ रुपयांचा अपहार करून फसवणूक केली.जिल्हा पणन अधिकारी भारतभूषण पाटील यांनी आंधळगाव पोलिस ठाण्यात तक्रार दाखल केली होती. यात पोलिसांनी १५ जणांविरुद्ध भादंविच्या ४०६, ४०९, ४२०, ४६७, ४६८, ४७१, ३४ अन्वये गुन्हा दाखल केला आहे.पुढील तपास सहायक पोलिस निरीक्षक नितीन राजकुमार करीत आहेत.
