दोन पोलिसांना आर्थिक देवाण- घेवाण करणे पडले महागात- दोन्ही कर्मचाऱ्यांना केले निलंबित; चंद्रपूर जिल्ह्यातील घटना

उद्रेक न्युज वृत्त

नवानगर वॉर्डातील मायाबाई बोरकर यांच्या गोठ्यातून दोन बकरे व दोन शेळ्या चोरी गेल्याची तक्रार देण्यात आली.संशयित म्हणून त्याच वॉर्डात राहणार अश्विन मेश्राम या युवकाचे नाव समोर आले.चौकशी करिता मेश्राम यांना पोलिस स्टेशनमध्ये आणण्यात आले व त्यांना मारहाण करून त्यांच्या कडून १५००० रुपये पानसे व गेडाम या कर्मचाऱ्यांनी घेतले.व त्यापैकी पाच हजार रुपये मायाबाईला दिले.मायाबाईने ते पैसे दुसऱ्या दिवशी परत केले.एकंदरीत हे सर्व प्रकरण पैसे घेऊन दडपण्याचा प्रयत्न दोन्ही कर्मचारी करीत होते. या प्रकरणाची माहिती सामाजिक कार्यकर्ते अजीत सुकारे यांना मिळताच त्यांनी विशेष पोलिस महानिरीक्षक नागपूर,पोलिस अधीक्षक चंद्रपूर, विभागीय पोलीस अधिकारी ब्रह्मपुरी यांना या प्रकरणाबाबत पत्रव्यवहार केला.तसेच विनाकारण मारहाण करून व जबरदस्तीने पैसे घेऊन मानसिक त्रास दिल्याबद्दल अश्विन मेश्राम यांनीसुद्धा वरिष्ठ अधिकाऱ्यांकडे दोन कर्मचाऱ्यांच्या विरोधात तक्रार दिली.तसेच मायाबाई बोरकर यांनीसुद्धा मला न्याय मिळावा; यासाठी वरिष्ठ पोलिस अधिकाऱ्यांकडे तक्रार केली.या तक्रारीच्या आधारे दोनही कर्मचाऱ्यांची तपासणी करण्यात आली तसेच सर्वांचे बयान घेण्यात आले व सरतेशेवटी प्रकरणाची गंभीरता लक्षात घेता पोलिस अधीक्षक चंद्रपूर यांनी तात्काळ दोनही कर्मचाऱ्यांना निलंबित केले.