वाघाच्या हल्ल्यात गुराखी गंभीर जखमी; वाघाची पाठीमागून झडप..

मिळालेल्या माहितीनुसार,कांचन खोब्रागडे हे आज  नेहमीप्रमाणे आपल्या घरच्या गायी,म्हशी व शेळ्या चारण्यासाठी सावंगी बडगे गावाजवळील गोसेखुर्द कालव्याच्या जंगल शिवारात गेले होते.गुरे चराई करीत असतांना ते बाजूलाच मोकळ्या जागेत बसून होते. दरम्यान,झुडपात दबा धरून बसलेल्या पट्टेदार वाघाने अचानक त्यांच्या दिशेने पाठीमागून हल्ला चढवला. अचानक झालेल्या हल्ल्यामुळे कांचन खोब्रागडे यांनी आरडाओरड करायला सुरुवात केली.त्याचवेळेस काही अंतरावर असलेले गुराखी रवी वाटगुरे यांनीही जोरजोराने ओरड केली असता वाघाने जंगलाच्या दिशेने धूम ठोकली.मात्र,वाघाच्या हल्ल्यात कांचन खोब्रागडे यांना गंभीर दुखापत झाली.त्यांच्या खांद्यावर वाघाच्या पंज्याचा मोठा खड्डा पडला असून हात आणि कंबरेला मोठा मार लागला आहे.घटनेची माहिती गावात होताच ग्रामस्थांनी घटनास्थळी धाव घेत जखमी अवस्थेत खोब्रागडे यांना दुचाकीवरून तळोधी येथील शासकीय रुग्णालयात दाखल केले.त्यानंतर,वन विभागाच्या अधिकारी व कर्मचाऱ्यांनी रुग्णालयात भेट दिली.प्रकृती गंभीर असल्याने त्यांना पुढील उपचारार्थ चंद्रपूर शासकीय रुग्णालयात हलविण्यात आले असून घटनेने परिसरात भीतीचे वातावरण पसरले आहे.