उद्रेक न्युज वृत्त
गुवाहाटी :- आसाममधील उदलगुरी जिल्ह्यात पोलिसांनी चुकीच्या ओळखीच्या आधारे एका व्यक्तीला दरोडेखोर समजून त्याचे एनकाउंटर केले.गुन्हे अन्वेषण विभागाच्या तपासात रविवारी याबाबत पुष्टी झाली.चकमकीत मारला गेलेला व्यक्ती दरोडेखोर केनाराम बोरो उर्फ केनाराम बसुमातारी हा नसून त्याचे नाव डिंबेश्वर चहा असल्याचे तपासात समोर आले आहे.तो एक शेतकरी असल्याचा दावा त्याच्या कुटुंबियांनी केला आहे.परंतु पोलिसांचा दावा आहे की,तो सराईत गुन्हेगार होता.रौता भागातील धनसिरीखुटी गावात २४ फेब्रुवारीला झालेल्या चकमकीत दोन पोलिस जखमी झाले. बोरोच्या आईने हा मृतदेह आपल्या मुलाचा असल्याचे ओळखल्यानंतर मृतदेह तिच्या ताब्यात देण्यात आला.
यानंतर पोलिस ठाण्यात तक्रार दाखल करण्यात आली.त्यानंतर आसामचे मुख्यमंत्री हिमंता बिस्वा सरमा यांनी पोलिस महासंचालकांना सीआयडी चौकशीचे आदेश देण्याचे निर्देश दिले.घटनेची २ मार्चपासून चौकशी सुरू करण्यात आली.पोलिस अधिकाऱ्याने सांगितले की, सदर मृतदेह बाहेर काढून त्याचे डीएनए विश्लेषण करण्यात आले.यात हा मृतदेह बोरोचा नसून मुचाहारीचा असल्याचे समोर आले.तपास अहवाल लवकरच सरकारला सादर करण्यात येणार असून मृतदेह मुचाहरी यांच्या कुटुंबीयांच्या ताब्यात देण्यात येणार असल्याचे त्यांनी सांगितले.दुसरीकडे, पोलिसांनी आपल्या मुलाची हत्या दरोडेखोर असल्याच्या संशयावरून केल्याने आपल्याला न्याय मिळावा, अशी मागणी मुचाहरीच्या कुटुंबीयांनी केली आहे.
